आज शुक्रबार! हाम्रा चौतारीका साथिहरलाई के चाहियो, तिनापने तुइँक्याउने अर्को सुनौलो अवसर!
कति मासु खानु, कहिलेकाहिँ दिक्क लाग्दो हो! ल आउनुहोस आज आलुको सितन बनाउने तरिका!

आलुको सितन नं१ (हाम्रो आफ्नै ह्यास ब्राउन)-

सामाग्री-
१) ५-६ वटा मध्यम साइजको आलु
२)तेल
३)नून र जिरा अनि रातो खुर्सानीको धुलो
४)एउटा फ्राइ गर्ने मिल्ने ताप्के...ताप्के क्या त..बुझिएन? प्यान भन्या के!

बिधी-
१) आलुलाई सकेसम्म पातलो र मसिनो गरेर काट्नुहोस।
२)ताप्केमा तेल तताउनुहोस ( मजाले हाल्नुहोस आजै हर्टअट्याक हुँदैन)
३)तातेको तेलमा जिरा फुराउनुहोस र जिरा पड्किन थालेपछि आलुको भुजुरी (अगि सानो पारेर काट्या हैन?) हाल्नुहोस, नून छर्कनुहोस र छिटो छिटो चलाउनुहोस। चलाको चलायै गर्नुहोस कतै रातो हुन्छ पल्टाउँदै चलाउनुहोस, कतै साह्रो हुन्छ धेरै पाकेर, तर  बाल मतलब चला भन्या छ भनेर चलाउँदै जानुहोस तर धेरै डढ्न भने नदिनुहोस। एकछिन पछि मजाले पाक्छ। खुर्सानिको धुलो छर्कनुहोस र ताजा कागती निचोरेर हाल्नुहोस।
४) तिनपाने चिरिप्प पार्नुहोस र हाम्रो आफ्नै पाराको ह्यास ब्राउनको सितन खानुहोस

आलुको सितन नं२ (हाम्रो आफ्नै दामि आलु)-

सामाग्री-
१) ६-७ वटा मध्यम साइजको आलु
२) आधा प्याज
३) ३ पोटी लसुन
४)एउटा टुक्रो अदुवा जे पर्ला पर्ला
५) अलिकता जीरा,जिराको धुलो, धनियाको धुलो र मरिचको धुलो
६) नुन ठिक्क, रातो खुर्सानि ५-६ वटा वा दिक्क नलागुन्जेल
७) तेल अलिकता
८) एउटा गहिरो भाँडो र एउटा  ताप्के

बिधी-
१) गहिरो भाँडोमा आलु उसिन्नोस, बोक्रा छोडाउनुहोस र ठिक्कको टुक्रामा काट्नुहोस
२)प्याज मसिनो गरेर काट्नुहोस, लसुन र अदुवा पिस्नुहोस
३) ताप्केमा तेल तताउनुहोस,जिरा हाल्नुहोस र लगत्तै रातो खुर्सानि हाल्नुहोस, प्याज भुट्नुहोस रातो रातो भएपछि पिसेको लसुन र अदुवा हालेर एकछिन छलाउनुहोस।छलाउनुहोस हैन चलाउनुहोस स्पेलिङ बिग्रेछ।(मन लागे बेसार नि हाल्नुहोस)
४)नून हाल्नुहोस लगत्तै आलु हालेर सट सट चलाउनुहोस, मसला सबै आलुमा लागेपछि र आलु तातो तातो भएपछि झिक्नुहोस, धेरे नचलाउनुहोस नि फेरि आलु फाँडिन्छ!
५) एक टुक्रा क्वाप्प मुखमा हाल्नुहोस आज बाह्र बर्षमा आफैँले पकाएकोमा गजक्क पर्नुहोस।
६) तिनापने सुरुप्प पार्दै कहिले आलुको टुक्रा मुखमा हाल्नुहोस त कहिले त्यसैमा भएको रातो खुर्सानि किटिक्क टोक्नुहोस।

आलुको सितन नं.......धुत् धेरै आलु खानु हुन्न!