श्री: कक्षा शिक्षिकाज्यू, श्री चौतारी उच्च मा वि, साझाल्यान्ड विषय: अन्तर्वार्ताका उत्तरहरु लेखिपठाएको बारे। महोदय, उपरोक्त सम्बन्धमा, कक्षाशिक्षिकाज्यूले राख्नुभएको प्रश्नहरुको उत्तर तपसील बमोजिम लेखिपठाएको छु। मलाई शतप्रतिशत विश्वास छ कि भर्ना फि मिनाहा हुनेछ। स्कूल पढदा वन कुखुरो लखेट्न गयो कि गएन? जान त गएको हो। वनकुखुराको १ कचौरा मासु पनि त हजुरसमक्ष पेस गरेकै हुँ। मार्साबलाई गालि गर्ने नाम राख्यो कि राखेन? त्यो त मैले हैन। भउते चित्रे कुनैले होला। वर्षायाम मा बारिमा काक्रो चोर्न गयो कि गएन? काक्रो त चोरेको छैन। अलि सानै हुँदा भुन्टे काकाको तामा चाहिं भाँचेको हो है। अरु ३ जना केटाहरुसँगै तामा काँधमा बोकेर भाग्न लाग्दा गैरागामकी भट्टीनी बुढीले देखिन् । अनि त के र! हत्त र पत्त तामा-सामा त्यहीं छोडी बाटो लाग्न परेन? चोरेको त भएन नि, तामा जो बाँसको गाँजनिरै छोडेसि। हाफछुट्टि पछि खोलामा पौडि खेल्न गयो कि गएन? मिसले अन्तर-स्कूल पौडी खेलमा स्कूलको नाम राख्न सक्छ कि सक्दैन भनेर जाँच्न खोज्नुभा होला। त्यो त गइयो मिस्। त्यसो नगरेको भए कसरी अहिले बुढीगंगा पौडेर तर्न सक्थें र? एउटा पहेंलो मेडल चैं म ल्याउचु मिस्, ग्यारेन्टी भो ल! गृहकार्य गर्न छोडी खोपि खेल्न गयो कि गएन? त्यो पनि, गइयो मिस्। तर, क्यार्नी! मिसले ए बि सि डी लेख्न दिनुभा थ्यो। तेसको लागि चारधर्के कापी चाइनी रच। आफूसित चारधर्के कापी नभाको। खोपी खेलेरै भएनि कापी किन्नी पैसा जोड्न परो भनेर हो। ठुलो मान्छे भाभए मेरिज-सेरिज खेलेर जोड्नु हुन्थ्यो। आफू त सानै परियो, तास-सास क्यै आउँदैन क्या। भवदीय गालब