ल है, अर्को हप्ता आयो, अर्को अंक पस्केको छू, आशा छ, मन पराउनुहुनेछ |
**************************************
चकचके बाँदर शृंखलाको तेस्रो अंक
*************************************
मेरो बा कृषि बिकाश
बैंकमा जागीर खानुहुन्थ्यो | म अंगुर र जागीरको भिन्नता राम्रो संग
बुझ्दैनथें | जागीर भनेको अंगुर जस्तै साना साना दाना भएको खानेकुरा
जस्तो लाग्थ्यो | अनि मलाई मेरो बा संधै
कृषि बिकाश बैंकमा गएर एक्लै मिठो मिठो जागीर खाएको कत्ती मन पर्दैनथ्यो | “कहिले
कहिले त अलिकती घल ल्याएल दिए पनि हुनी नि” मन मनै सोच्थें|
कृषि बिकाश बैंकको
अगाडीको बाटो पारी हाम्रो स्कुल थियो | दाजु-भाईलाई एउटै स्कुलमा भर्ना
गरीदिनुभएको थियो | हामी दाजुभाई संगै बस चढेर स्कुल जान्थ्यौं | हाफ टिफिनमा बाटो
काटेर बाको अफिसमा संगै जान्थ्यौं | बाले आफ्नो अफिसको खाजा खाने ठाउँमा हामी
दाजु-भाईलाई लगेर खाजा खुवाउनुहुन्थ्यो | खाजा खाएर दाजु-भाई संगै बाटो काटेर
स्कुल फर्किन्थ्यौं | अनि स्कुल छुट्टी भएपछी संगै बस चढेर घर आउँथ्यौं | आमाले दाईलाई
“भाईलाई एक्लै नछोड है “ भन्नु भएको थियो, त्यै भएर दाईले मलाई स्कुलमा कहिले पनि एक्लै
छोड्नुहुन्थेन| चक-चक गर्न खोज्यो भने दाईले मलाई पिट्नुहुन्थ्यो | दाई म भन्दा
दुई बर्ष जेठो हुनुहुन्छ र बलमा पनि ठुलो, त्यसैले मैले चुप-चाप सहन्थें |
“बा, आज बेलुका घल
आउँदा, अलिकती जागील ल्याईदिनु न है |” एकदिन बालाई भनेको थिएँ| बेलुका घर आउँदा
बाले नेबिको गुल्कोज बिस्कुट लिएर आउनुभयो | बाले “यहि हो जागिर” भन्नुहुन्थ्यो
होला तर मैले बिस्कुट भनेर पहिल्यै चिनीसकेको
थिएँ | बाले झुक्क्याउने कोशिश पनि गर्नु भएन अनि भन्नु भयो, “सबै अफिसको साथीहरु मिलेर
खाँदा आजको जागिर सकियो, अनि तँलाई बिस्कुट किनेर ल्याईदेछु, ला, दाईलाई पनि दे “
| बाले खानेकुरा जहिले पनि दाजुभाई बाँडेर खानुपर्छ भन्नुहुन्थ्यो |
“आँफु चै एक्लै एक्लै जागील खानी, हाम्लाई चै बाँडेल खानु पल्छ ले”, मैले भन्न
मात्रै सक्दैनथें |
मलाई बाले खाने
गर्नुभएको जागीर हेर्ने र पाएसम्म चाख्ने मन ठुलो थियो | एक दिन हाफ-टिफिन नहुँदै बाटो काटेर बाको अफिस
पुगें | “लौ सानो कृष्ण सर आईपुग्नुभयो |” अफिसको गेटमा बस्ने भिम अंकलले ढोका
खोल्दिनुभयो |
म गुरुरु दुकुर्दै
बाको कोठामा पुगें | बा कुर्सीमा बसेर अगाडी टेबुलमा के के लेख्दै हुनुहुन्थ्यो |
यसो हेर्दा भर्खर जागीर खाएर भ्याएर होमोक गर्न बस्नुभएको जस्तो देखिन्थ्यो | म
पनि खाना खाएर भ्याएपछी चकटीमा बसेर त्यसरी नै सानु मिसको होमोक गर्थें | मेरो मन
खिन्न भयो | बाले आज पनि खाई सक्नुभएको रैछ र आज पनि मलाई छुट्यो |
एकैछिन् पछी दाई
आईपुग्नुभयो | “भाईलाई एक्लै नछोड्नु भनेको हैन, यस्तो चकचके छ, बाटो काट्न राम्रो
संग आउँदैन, बिचार गर्न पर्दैन ? ” बाले कडा स्वरमा गाली गर्नुभयो |
दाईले केहि भन्नुभएन
, तर खाजा खाएर फर्किएपछी दाईले मलाई बाटोमा दुई लात्ता हान्नुभयो | दाईको रिस पनि
मुनासीब नै थियो | मेरो बिठ्ठ्याईंले गर्दा दाईले बिना कारण दोष पाउनुभएको थियो | तर
म त्यो बुझ्दैन थिएँ | दाईको लात्ताको प्रतिकार गर्न पनि सक्दैन थिएँ | निरिह र लाचार
भएर सहें |********************************************
कान्छा काका बाहिर
गएर एक हप्ता अघि फर्किनुभएको थियो | हामीलाई दुईटा घडी ल्याईदिनुभएको थियो | एउटा
बत्ती बल्नी पिलपिले घडी, अनि अर्को तिनटा सुई भएको किउ एण्ड किउ घडी | मलाई
झिलिमिली बत्ती बल्नी पिलपिले घडी सार्है मन पर्यो, दुर्भाग्य दाईलाई पनि त्यहि
घडी मनपर्यो | दाईले जित्नुभयो | दाईको हातमा पिल्पिले घडी बाँधियो, मेरो हातमा बुढो
मान्छेको जस्तो बेरस, कालो किउ एंड किउ घडी | मलाई त त्यो नयाँ घडी हेर्न पनि आउंदैनथ्यो
अनि कति बजेको पनि थाह हुँदैनथ्यो | मलाई त्यो नयाँ घडी त डटपिनले नाडीमा कोरेको आलु
घडी जस्तै लाग्थ्यो, बेकामको | बिस्तारै मलाई आमाले घडी हेर्न सिकाइदिनुभयो |
********************************************
एकदिन हाम्रो
कक्षामा राजाराम सर आउनुभयो | अगाडी कालोपाटीमा दुईटा घडी बनाउनुभयो, एउटा साँढे
चार बजेको अनि अर्को पौने १२ बजेको |
“कसले भन्न सक्छ यो
कती बजेको भनेर?” सर ले सोध्नुभयो |
“मैले सक्छु सल”,
मैले खुशी भएर चिच्याएँ |
“तैंले मेरो नाम त
भन्न सक्दैनस, ल मेरो नाम भन् त”
“लाजालाम् सल्“ |
मैले “र” लाई “ल” भनेर तोते बोलेको सरलाई सार्है मन पर्थ्यो | कति चोटी मैले होमोक
नगर्दा त सरले “मेरो नाम भन्न सकिस भने छोडीदिन्छु” समेत भन्नु हुन्थ्यो अनि मैले
सरको पिटाईबाट बच्न असफल प्रयासहरु गरीरहन्थें “लाजालाम् सल्, लाजालाम् सल्”
आजको कुरा बेग्लै
थियो |अगाडी कोरीएको घडीमा कती बजेको थियो मलाई थाह थियो | मैले भने, “ चाल बजेल तिस
मिनेट गको, अनि अल्को एघाल बजेल पैतालिस् मिनेट गको|”
“ल हिंड् म संग |”
सरले मलाई संगै लिएर जानुभयो | म पछी पछी हिंडे |
अर्को कक्षामा पसेर
सरले फेरी भन्नुभयो “कती बजेको भन्दे त फेरी |”
“चाल बजेल तिस मिनेट
गको, अनि अल्को एघाल बजेल पैतालिस् मिनेट गको|”
सरले कक्षामा भएका
सबैतिर हेर्दै भन्नुभयो, “तिमीहरु भन्दा सानो फुच्चेले भन्न सक्छ, तिमीहरु सक्दैनौ
?” अनि मतिर फर्केर भन्नुभयो, “यिनीहरु सबै नजानेर उठेका हुन्, सबैलाई पिट् |”
सरले मलाई एउटा छडी पनि दिनुभयो | किरणदाई मात्र बस्नुभएको थियो, अरु सबै
उभिनुभएको थियो | मेरो खुशीको सिमा रहेन जब उभिनेहरुको लाईनमा दाई पनि
हुनुहुन्थ्यो | कुशल दाई मलाई माया गर्ने दाई, कुशल दाईलाई बिस्तारै पिटेको जस्तो गरें | शुबाश
दाई र प्रफुल दाई मेरा साथीहरु शरद र रोशनको दाई | रोशन र शरदको लागी मैले बदला
लिनु थियो , बेस्सरी पिटें | सबैलाई पिट्दै गएँ |
“ओइ बिस्तारै पिट् है” दाईले भन्नुभयो | बाको अफिसबाट फर्किदा बाटोमा लात्ताले
हान्नुभएको सम्झिएँ | म दाईको अगाडी लट्ठी लिएर उभिएको थिएँ | म होंचो थिएँ, टाउको
माथी फर्काएर दाईलाई हेरें |मेरो खुशी मेरो मुस्कानमा छताछुल्ल भएर पोखियो | मेरो लागी
त्यो सन्तुष्टीको मिठो मुस्कान, दाईको लागी डरलाग्दो र भयानक थियो जुन दाईका आँखामा
प्रस्ट देखिन्थ्यो | पिटाई खान दाईले हत्केला अगाडी बढाउनुभयो | मलाई त्यो बेला स्वर्गानुभुती
भयो | बदला लिने यो अवसर मैले कहाँ गुम्न दिन्थें र ? मैले सकेको बल निकालेर हानें
| दाईको पिलपिले घडीको झिलझिले बत्ती झ्याप्प निभ्यो | घडीका साना साना टुक्रा
भुईंमा छरीए, दाईको मुटुका टुक्राहरू जस्तै |