हट्यो सारा हिलो मैलो
हरायो पानीको वर्षा
भवानीको भयो पूजा
चल्यो आनन्दको वर्षा
जता जाउ उतै भन्छन्
दशैं आयो दशैं आयो
यही आनन्द चर्चाले
सबै संकष्ट बिर्सायो
ठूला साना सबैलाइ
दशैं अत्यन्त राम्रो छ
चलेका चाडमा ज्यादै
यही उत्कृष्ट हाम्रो छ
सबै अत्यन्त आनन्दी
सबै छन् पिङमा दंग
सबैको देखिंदै आयो
उज्यालो चेहरा रंग
–लेखनाथ पौड्याल
दशै नमनाएको पनि ५ बर्ष भएछ। अब दशै पनि एउटा कथा जस्तो भयो। ५ बर्ष अगाडि दशै मनाउदा घरमा हजुरआमा हुनुहुन्थ्यो दिदी बहिनी सबै थिए अब हजुरआमाले पनि संसार छोडेर जानु भयो अनी दिदी बहिनी बिहे गरेर आफ्नो घर तिर लगे। घरमा बिचरा आमाबुवा मात्र हुनुहुन्छ। आमाले हिजो फोन गर्नु भयो अनी सुक्क सुक्क गर्दै भन्नु भयो "ल बाबु यो पाली को दशैमा पनि टिका लाउन नपाईने भयो। अब कहिले आउछस दशैमा घर?" आमालाई केही भन्नै सकिन। मनमनै भने "आफुले भनेको जस्तो हुने भये त अहिले आउथे तर के गर्ने हुँदैन। अझै कतीवटा दशै छुत्ने हो केही थाहा छैन।"