? 
सभासद् विश्वेन्द्र पासवानकी छोरी पोइल गइन्, केटाद्वारा प्राणरक्षाका लागि अपिल
–राजकुमार राम, लहान-
उदेगलाग्दो कुरा के छ भने आफूलाई दलितको नेता भन्दै जातीय समानताका लागि संसदमा मात्र नभई सर्वत्र आवाज उठाउने सभासद पासवानले आफूभन्दा सानो जातको र आफ्नै अफिसमा काम गर्ने केटोले छोरी भगाएर इज्जत फालिदिएको भन्दै आक्रोसित हुँदै आफ्ना वफादार केन्द्रीय सदस्य सर्लाहीका राधेश्याम पासवान र सप्तरीका जगजीवन राममार्फत् ज्वाइँ राजलाल खत्वेलाई जहाँ भेटायो, त्यहीँ खलास गर्नू, अन्यथा म राजनीति नै छोडिदिन्छु भन्दै धम्कीपूर्ण उर्दी जारी गरेका छन्।
उनको यो उर्दी सुनेर ज्वाइँ राजलाल खत्वे आफ्नी श्रीमती विद्या र आफ्नो प्राण रक्षाका लागि आफ्ना साथीहरूको डेरामा लुकेर बसेका छन्।
सभासद पासवानले छोरी र भगाउने केटालाई खलास गर्न वफादार केन्द्रीय सदस्यहरू मार्फत् २ लाख रूपैयाँ दिई २० जना मधेससम्बद्ध भूमिगत गिरोहका कार्यकर्ता काठमाडौंका होटेल–लज तथा मजदुरहरूका डेरामा विगत केही दिनदेखि छापा मार्न पठाएको कुरा नाम नबताउने शर्तमा पार्टीका एकजना कार्यकर्ताले बताएका छन्।
प्रेम–विवाह गर्नु कुनै अपराध नभएको बताउने राजलाल खत्वेले, आफ्ना उदण्ड, पागल एवं अपराधी मनोवृत्तिका ससुरा विश्वेन्द्र पासवान संसदमा समेत कुर्सी–टेबल तोड्न, कपडा च्यात्न र मान्छे उठाएर झ्यालबाट फ्याँक्न पछि नपर्नेले मजस्तो गरिब, निमुखा र सानो जातको व्यक्तिलाई के बाँकी राख्लान् र भन्दै आफ्नो प्राण रक्षाका लागि सबैसँग अपिल गर्दै पत्रकार सम्मेलन गरी सार्वजनिक हुन चाहेको र आफ्नो र आफ्नी श्रीमती विद्याको कहीँ कतै हत्या भए वा घटना घटेमा त्यस्को सम्पूर्ण जिम्मेवारी सभासद ससुरा विश्वेन्द्र पासवानको हुने बताएको सम्बद्ध स्रोतले बताएको छ।
विश्वेन्द्रका ज्वाइँ राजलाल खत्वेको परिवारसँग सम्पर्क गर्न खोज्दा निजकी आमा र दिदीलाई यो कुरा बाहिर गरे ठीक हुने छ्रैन र बहुत ठूलो क्षति ब्यहोर्नुपर्ने छ भनी, धम्की दिइएको दाजु पर्ने चन्द्रलाल खत्वेले बताउँदै भाइ राजलाल खत्वेको प्राण जोखिममा रहेको र जसरी पनि बचाइदिनुस् हजुर! हामी दलित, गरिबको को छ र? भन्दै मोबाइलमै अलाप–विलाप गरी हार–गुहार गरेका छन्।