पाइलटबीच कुटाकुट, उद्दार गर्न अर्को विमान

काठमाडौं, १६ जेठ (नागरिक)- नेपाल एयरलाइन्स (एनएसी)को एउटै उडानका पाइलट र को-पाइलटबीच कुटाकुट भएको छ। शुक्रबार एनएसीको विमान उडाएर सँगै मनाङ पुगेका एलबी थकाली र को-पाइलट राजन कुइँकेलबीच कुटाकुट भएको हो।

एकै उडानबाट मनाङ पुगेका पाइलटहरुबीच झगडा भएपछि शुक्रबार एनएसीको ट्विनेटर बिहान काठमाडौं फर्किएन। पाइलट झगडाका कारण जहाज मनाङमै अड्किएको खबर आएपछि नेपाल एयरलाइन्सले थप पाइलट सहितको अर्को जहाज शनिबार त्यसतर्फ पठायो।

नियमित उडानका लागि लुक्ला जान तयार रहेको विमान शनिबार बिहान एक्कासि पाइलटको टोली सहित मनाङतर्फ लाग्यो। सो बिमानमा गएका थप पाइलटले बिमान तथा झगडालु पाइलटहरुलाई काठमाडौं फर्काएका छन्।

घाइते को-पाइलट कुइकेललाई बेहोस अवस्थामा काठमाडौं ल्याइपुर्याइएको छ। उनलाई विमानस्थलबाट सोझै अस्पताल लगिएको छ। अधिक रक्तस्रावका कारण उनी बेहोस भएको बताइएको छ। कुइकेलको हातमा गम्भीर चोट लागेको छ।

झगडालु पाइलटले शुक्रबारको रात एयरपोर्ट नजिकै रहेको स्नोल्याण्ड होटलमा बिताए।
पाइलटहरुबीच किन कुटपिटको भयो भन्ने खुल्न सकेको छैन।