काठमाडौं,
९ चैत
2009-03-23,Monday
राष्ट्रिय सतर्कता केन्द्रले दुई महिना छड्के गर्दा दुई हजार कर्मचारी कारबाहीमा परेका छन् । मन लागेको दिन मन लागेको वेला कार्यालय जाने मात्र होइन, मन लागेको वेला हिँड्नेमा साधारणमात्र होइन, सहसचिव, उपसचिव, शाखा अधिकृत र इन्जिनियरसमेत छन् ।
दुई महिनामा दुई हजार |
राष्ट्रसेवक कर्मचारीको कार्यालय-समय बिहान १० बजेदेखि साँझ पाँच बजेसम्म तोकिएको छ । 'तर, धेरै कर्मचारी ११ बजेसम्म पनि कार्यालयमा नपुग्ने र दिउँसो चार नबज्दै कार्यालयबाट बाहिरिन्छन्,' सर्तकता केन्द्रका अधिकारीहरूको अनुभव छ । कर्मचारीमाथि निगरानी राख्ने जिम्मेवारी पाएको केन्द्रले गैरजिम्मेवार कर्मचारीलाई कारबाही गर्न सम्बन्धित कार्यालयलाई निर्देशन दिएको छ । सम्बन्धित कार्यालयले पनि स्पष्टीकरण सोधी सचेत-पत्र थमाएका छन् ।
केन्द्रले १९ माघदेखि सरकारी कार्यालयमा छड्के जाँच गर्दै आएको छ । छड्केमा अर्थ मन्त्रालयका सहसचिव रणबहादुर श्रेष्ठ पनि परेका छन् । उनी झन्डै एक सातासम्म विनाजानकारी कार्यालयमा अनुपस्थित रहेको पाइएको थियो । केन्द्रले श्रेष्ठलाई आवश्यक कारबाही गर्न अर्थ मन्त्रालयलाई निर्देशन दिएको छ ।
यसैगरी, छड्केमा परेका अर्थका उपसचिवहरू शीलकुमार ओझा, हरिशरण पुडासैनी, अविनाश राई, तीर्थराज केसी, सुशील ढकाल, दुर्गेशकुमार प्रधान, उपेन्द्रकुमार खनाललाई पनि स्पष्टीकरण सोधिएको छ ।
अनुगमनका क्रममा सबैभन्दा बढी कर्मचारी नेपाल विद्युत् प्राधिकरणमा अनुपस्थित रहेको पाइएको छ । केन्द्रका अनुसार प्राधिकरणमा दैनिक औसतमा एक सय ५८ कर्मचारी अनुपस्थित रहन्छन् । प्राधिकरणका अन्य कर्मचारी पनि हाजिर गरेर अन्यत्र लाग्ने र कार्यालयमा नबस्ने गरेको पाइएको केन्द्रले तयार पारेको प्रतिवेदनमा उल्लेख छ ।
अनुगमनका क्रममा एकै दिन १६ जना इन्जिनियर पनि अनुपस्थित रहेको पाइएको छ । केन्द्रका अनुसार खानेपानी तथा ढल निकास विभागमा कार्यरत ती इन्जिनियर विनाजानकारी लामो समयदेखि कार्यालयमा अनुपस्थित रहने गरेको पाइयो । यसरी अनुपस्थित रहने इन्जिनियरमा द्वारिकाप्रसाद श्रेष्ठ, जनकभूषण धौभडेल, एकराज शाक्य, संघबहादुर गुभाजू, रमेशलाल नापित, कृष्णभक्त महर्जन, महेन्द्रकुमार महर्जन र बलबहादुर गुरुङ छन् ।
यसैगरी इन्जिनियरहरू मोहनकुमार भण्डारी, रामकृष्ण महर्जन, हिमनाथ लामिछाने, सुमन कर्माचार्य, जीवन महर्जन, प्रह्लादमानसिंह प्रधान, विष्णुप्रसाद श्रेष्ठ, बाबुकाजी कसजू पनि कारबाहीमा परेका छन् ।
छड्केमा गृह मन्त्रालयका उपसचिव हरिबहादुर अधिकारी, न्हुच्छेमान महर्जन, रमेशचन्द्र अधिकारी, एकमणि नेपाल पनि परेका छन् । यसैगरी सो मन्त्रालयका शाखा अधिकृत दुर्गाप्रसाद तिवारी, चन्द्रप्रसाद बस्याल, हीराकाजी महर्जन, बद्रीनारायण श्रेष्ठ पनि छड्केमा परे । सामान्य प्रशासन मन्त्रालयका उपसचिव उर्वादत्त भट्ट, सूर्यप्रसाद श्रेष्ठ तथा शाखा अधिकृतहरू अनन्तकुमार बस्नेत, रुद्र खरेल, बुद्धिप्रसाद उपाध्याय र ईश्वरीदत्त प्रधानले पनि छड्केमा परी स्पष्टीकरण खाएका छन् ।
दुई महिनाको विशेष अनुगमन र निगरानीका क्रममा हालसम्म दुई हजार कर्मचारी छड्केमा परेको केन्द्रका प्रवक्ता शेरबहादुर ढुंगानाले जानकारी दिए । ढुंगानाले नयाँ पत्रिकासँग भने 'प्रशासनयन्त्रलाई चुस्त बनाउन छड्केलाई निरन्तरता दिइरहनेछौँ । '
दुई महिनाको अवधिमा विभिन्न मन्त्रालय, विभाग, आयोग तथा नियोगमा छड्के जाँच गरिएको थियो । आन्तरिक राजस्व कार्यालय क्षेत्र नं. १ र २ का गरी २७ जना, भूमिसुधार तथा व्यवस्था विभागका ६ जना, ललितपुर उपमहानगरपालिकाका १३ जना, काठमाडौं महानगरपालिकाका ५३ जना छड्केमा परेका छन् । यसैगरी, मुद्रण विभागका ४५, सिटिइभिटीका २१, गृह मन्त्रालयका २९, यातायात व्यवस्था विभागका १५, वन तथा भू-संरक्षण मन्त्रालयका पाँच, अर्थ मन्त्रालयका ३२, जलस्रोत मन्त्रालयका ११, कम्पनी रजिस्टार कार्यालयका पाँचजना पनि छड्केमा परेका छन् । केन्द्रले छड्के जाँचलाई देशव्यापी पारेको प्रवक्ता ढुंगानाले जानकारी दिए ।
http://www.nayapatrika.com/newsdetail.php?id=903231227229563&n_id=23