काठमाडौँ, चैत ३ गते । राजस्व छलीलाई रोक्न अर्थ प्रशासनले बजार निरीक्षणलाई प्रभावकारी बनाएको छ । आयको स्वयंघोषणा कार्यक्रमसम्मलाई अर्थ मन्त्रालयको आन्तरिक सहमतिमा बजार निरीक्षण केही सिथिल बनाइएको थियो । आयको स्वयंघोषणा कार्यक्रम सकिएको तेस्रो दिन सोमबार राजस्व अनुसन्धान विभागले आरबी कम्प्लेक्सका आठवटा र सुरज आर्केडको एउटा पसलमा सिलबन्दी गरेको छ ।

सिलबन्दी सुरु गरेपछि स्थानीय व्यापारीले विभागका कर्मचारीलाई बन्धक बनाएका थिए । चार घन्टासम्म बन्धक बनेका कर्मचारीलाई विभागको आग्रहपछि नेपाल प्रहरी र सशस्त्र प्रहरीले उद्धार गरेको राजस्व अनुसन्धान विभागका महानिर्देशक टङ्कमणि शर्माले जानकारी दिनुभयो ।

विभागले बजार निरीक्षणलाई प्रभावकारी बनाएपछि राजस्व प्रशासन र व्यापारीबीच विवादसमेत बढेको छ । नेपाल चेम्बर अफ कमर्सका अध्यक्ष सुरेन्द्रवीर मालाकारले चेम्बरसँगको सहमति तोडेर विभागले छापा मारेको दाबी गर्नुभयो ।

उहाँले यस विषयमा स्थानीय चेम्बर अफ कमर्स, नेपाल उद्योग वाणिज्य महासङ्घ र नेपाल उद्योग परिसङ्घको सहमतिपछि आन्दोलन थालिने चेतावनीसमेत दिनुभयो । अध्यक्ष मालाकारले राजस्व अनुसन्धान विभागले सशस्त्र सुरक्षाकर्मीलाई परिचालन गरेर व्यापारीलाई आतङ्कित पारेको टिप्पणीसमेत गर्नुभयो ।

विभागका महानिर्देशक शर्माले राजस्व छलीको सूचनाका आधारमा पसललाई सिल गरिएको बताउनुभयो । उहाँले सिल गरिएका पसलमा राजस्व छलीसम्बन्धी छानबिन गरिने तथा सिल तोड्ने र कर्मचारीलाई अभद्र व्यवहार गर्ने व्यापारीलाई प्रशासनिक कारबाही गर्नेसमेत बताउनुभयो ।

महानिर्देशक शर्माले कर छल्नेसँग वार्ता र सहमति नगरिनेसमेत बताउनुभयो । "कानुनी प्रक्रिया जे हुन्, ती सबै कानुनी प्रक्रियाअनुरुप हुन्छन् । छली भए व्यापारी कारबाहीको भागिदार हुनुपर्छ", महानिर्देशक शर्माले भन्नुभयो । उहाँले छलीविरुद्धको कारबाहीमा व्यापारीलाई सूचना दिएर जान नसकिने स्पष्टसमेत पार्नुभयो ।

राजस्वको छानबिनविरुद्ध व्यापारीले सोमबार न्युरोड, असनलगायतका बजार बन्द गराएका थिए भने राजस्वका कर्मचारीलाई उद्धार गर्न आएका सुरक्षाकर्मीलाई ढुङ्गासमेत प्रहार गरेका थिए । आरबी कम्प्लेक्स व्यापार सङ्घका पूर्वअध्यक्ष परशुराम दाहालले कानुनको विरोध नगरी पसल सिल गर्ने प्रक्रियाको विरोध गरेको बताउनुभयो ।

सुरज आर्केड व्यापार सङ्घका अध्यक्ष हिम स्वारले विभागले शङ्काको भरमा व्यापारीलाई तर्साउने प्रवृत्तिको विरोध गरेको बताउनुभयो ।

http://www.gorkhapatra.org.np/gopa.detail.php?article_id=15836&cat_id=14

राजस्व अनुसन्धान विभाग को कर्मचारीहरु होस् गर्नुस् है कतै अगाडि शिल लको छु भनेर makhha  पर्नु होला। तर बाँकी सबै समान हरी ब्याकडूर बाट गायब होला नि।