जातीय स्वशासनया नितिं माओबादी ज्यान बिया ल्वात धा:गु पत्या: मजू । जातीय स्वशासनया नारा ल्ह्वंगु ख: तर व नाराया ल्यूने सोझापिं जनजातियात फसेयाना जनसेनाय् भर्ना यायेगु चाल जकं मखुला धैगु शंका शुरुंनिसेँ आ:तक नं दनि । यदि अथे मखु धैगु ख:सा आ: सरकारय् वयेधुंका धमाधम सरकारय् जातीय समानुपातिक उपस्थीति दयेकेउ ज्या यायेमा:गु ख: । ग्व ले सा ? नियुक्ति, प्रमोशन खाली बर्मूत जक हे जुयाच्वन । माओबादी पार्टी पिनेया खँ त्व:ता छ्वये, पार्टी दुने हे बर्मुतयेसँ धमाधम एकाधिकार याना च्वन । मन्त्री नियुक्त या:पि ग्व:म्ह बर्मु दु स्वयादिसँ । प्रशासनय् बर्मूतय एकाधिकार, परराष्ट्र सेवा, संसार ज्व:छिया नेपाली एम्बेसी बर्मू या बर्मू जक, थ्व असमानता हटे याना मेउ जातिपिन्त नं थाय् बिइत माओबादी सरकारं छुं वास्ता याना च्वँगु मदु ।

उलि जक मखु, माओबादीया १३-१४गु जातीय मोर्चाय् नं च्वये च्वयेया पद धमाधम बर्मुतयेत बियाहल । नेवा मुक्तिमोर्चाय् झक्कुसुवेदी तयेहल । वं नेवा: भाय् ल्हाय नं मस:, नेवा संस्कृति छु धका: थु नं मथू । अज्यापिं जाग्वारा बर्मुतयेत जवरजस्ति छेनय् तया पवनमान थें ज्याम्ह, रविन्द्र श्रेष्ठ, दिलीप प्रजापति थें ज्याम्ह धिमे ज्वना जात्राय् वनीपिं भुमिपुत्र नेवा:त छखे छखे लाकल । आ: गये याना विश्वास यायेउ ? खाली फयगं नाराया ल्यू ल्यू वनां ज्यू ला ? हि क्वाकेत जातीय स्वशासन धका तीं तीं न्हुल, आ: म्हुतुइ सुकां सुया ल्हा: प्व: चिना च्वन ।

अले उपत्यकायात नेवा: राज्य दयेकेउ मागय् नं जिगु समर्थन मदु । नेवा: राज्य मखु, नेवा: स्वायत्त राज्य मा: । नामय नेवा: राज्य अले अधिकार छुं मदुसा छु यायेत व राज्य ? माक:या गला: जक जुइ । नेवा: स्वायत्त राज्यया सिमाना नं उपत्यका जक जुइमज्यू, झीगु नेपाल मण्डल दक्वं दुथ्याके मा: । नेपाल मण्डल दुने नेवा: स्वायत्त राज्य दयेकेउ माग माओबादी न्ह्यज्याकल धा:सा जक इमित विश्वास याये फै, मखुसा इपिं न परम्परागत बर्मूबादी (खँयबादी) त हे ख्वा:पा: हिला नेवा:तयेत झंग: लायेत व:पिं ख: । थुकिं शंका मदु ।