राजधानीका 'डन’ चक्रे मिलन भन्छन्- 'पोलिटिक्समा जान्छु'
2008-07-07,Monday केपी ढुंगाना/नयाँ पत्रिका ग्याङ होइन के, मेरा भाइहरू हुन् । कोही मेरो बिजनेसका सहयोगी हुन् । सबै बिजनेस मैले मात्र हेरेर सक्छु ? सहयोगीहरू चाहिएन ? तर, सधैं त्यस्तो ग्याङ बोकेर कहाँ हिँडेको छु र ? तर, तपाईंको व्यापारका देखाउने र खाने दाँत बेग्लाबेग्लै छन् रे, हो ? कहाँ हुन्छ, त्यस्तो ? सब मेरा शत्रुहरूको हल्ला हो । अलिकति पपुलर भएपछि शत्रुले नचाहिँदो हल्ला गर्ने र'छन् । म त नियमकानुन मानेर व्यवसाय गर्ने मान्छे परेँ । म किन चलाउँछु यार भूमिगत शैलीमा व्यवसाय । हप्ता असुली पनि व्यवसाय हो ? हप्ता असुली व्यवसाय होइन । तपाईं व्यापारीलाई धम्क्याएर हप्ता असुली गर्नुहुन्छ, होइन ? कस्तो हावा कुरा गर्नुहुन्छ तपाईं ? मैले अहिलेसम्म हप्ता असुली गरेको छैन । कागले कान लग्यो भनेर कागको पछि लाग्ने कि कान छाम्ने हो ? लेखेर राख्नुस्, मैले अहिलेसम्म न एकजनाबाट हप्ता उठाएको छु न एकजनालाई धम्क्याएको छु न कसैको अपहरण गरेको छु । त्यस्तो गरेको भए त चक्रेले कति कमाउँथ्यो कति । तपाईं गन्न पनि भ्याउनुहुन्थेन । मलाई मेरो पुख्र्यौली सम्पत्तिले नै खान पुग्छ । यही एरियामा पाँच रोपनी जग्गा छ । आठ-दस करोडको सम्पत्ति छ । किन हप्ता असुली गर्नुपर्यो मलाई ? तपाईंका केटाहरूले पनि गर्दैनन् ? म ग्यारेन्टीका साथ भन्छु- गर्दैनन् । कसैले गरेको प्रमाण भए म तिनलाई कारबाही गराउन प्रहरीलाई सघाउँछु, ल । तर, हाम्रो पुलिसमै समस्या छ के । कसैले केही गर्यो कि मेरो नाम मुछिहाल्छन् उनीहरू । भारेभुरेहरूले म चक्रेको मान्छे हुँ भन्दै थर्काउँदै हिँड्छन् । पक्रेर सजाय गर्नुको साटो पुलिस चैं मेरो पछि लाग्छ । कहाँ कसले मेरो नाम बिकाएर गलत काम गरिरहेको हुन्छ, त्यो मलाई कसरी थाहा हुन्छ ? त्यस्तो कुनै घटना भए, मलाई जानकारी दिए त म स्पष्ट गरिहाल्थेँ नि । तर, उनीहरू अनुसन्धान नै नगरी मेरो नाम लिन्छन् । तपाईसँग थुप्रै हतियार छन् रे, हो ? हतियार छन् नि । भान्छामा गएर हेर्नुस् त चक्कु, चुलेसी, खुकुरी टन्न छन् । त्यस्तो हतियार भनेको होइन, बन्दुकहरू ? छैन, छैन एउटै छैन । दीपक गुरुङ र तपाईंबीच ग्याङफाइट हुने चर्चा छ नि ? अचम्म छ भन्या ? कसरी चल्छ यस्तो हावा हल्ला ? यो सब हिन्दी फिल्मको प्रभाव हो । यहाँ सब फिल्मको जस्तो सोच्छन्, बेबकुफहरू । एउटा जेलबाट निस्कन्छ अनि सखाप पार्छ । तर, वास्तविक जीवन र चलचित्रमा फरक छ । यो हावा मात्र हो । मेरो तर्फबाट त्यस्तो केही हुँदैन । म त केही समय आराम गरेपछि आफ्नै बिजनेसमा फर्किहाल्छु । त्यस्तो वार-स्वार केही हुन्न । ऊ उसको व्यापार गर्छ, म मेरो व्यापार गर्छु । उसको र मेरो व्यापारको नेचर नै फरक छ । म उसको व्यापारमा इन्टरफेयर गर्न जान्न । अब मेरोमा आयो भने छोडिँदैन । त्यसो भए अब तपाईंका तर्फबाट लफडा हुन्न ? यसभन्दा अगाडि म जेलबाट निस्कनासाथ ह्वार्र ग्याङवार भए । फेरि म जेल परेपछि शून्य भयो । तर, त्यो संयोग मात्र हो, प्लान होइन के । तर, कोही आइलाग्छ भने त जाइलाग्न त परिहाल्यो । कोही मलाई वा मेरा केटाहरूलाई हान्न आयो भने चुप लागेर बस्ने व्यक्ति परिनँ म । पहिला म कसैलाई हान्दिनँ, तर कसैले हान्यो भने छोड्दिनँ । पहिला ग्याङफाइट किन भयो त ? दीपक र मबीच दुश्मनी नै थिएन । ग्याङवार गराएर फाइदा लुट्ने समूह छन्, यहाँ । केटाहरू पनि छन्, केही पुलिसहरू पनि छन् । उनीहरूले हामी दुवैबीच कुरा लगाएर असमझदारी बढाएर ग्याङवार गराएका हुन् । केही प्रहरी छन् जो अपराध नियन्त्रणको साटो ग्याङवार गराएर फाइदा लुट्ने योजनामा हुन्छन् । मकहाँ आयो दीपकको कुरा गर्यो, दीपककोमा गयो मेरो कुरा गर्यो । तिनीहरूले नै जुधाएका हुन् । अहिले कुरा मिल्यो ? कुरा मिल्ने-नमिल्ने मलाई थाहा छैन । म कसैलाई हान्न जान्न । अब कोही हान्न आउँछ भने सुतेर बस्ने त कुरै छैन । म शनिको भक्त । जसले मिलन चक्रेलाई छुन्छ, त्यसलाई शनिको दसाले छुन्छ । कुरा यत्ति हो । एक वर्षको जेलअवधिमा तपाईंको सञ्जाल ध्वस्त भयो रे, हो ? मार्केटले देखाउँछ, कसको सञ्जाल बलियो छ, कसको भत्कियो भन्ने । जुन दिन चक्रेमाथि कसैले हात हाल्छ त्यो दिन देख्नेछ को कति बलियो छ भन्ने । जेल जाँदा छोड्न चार सय साथीहरू आएका थिए । बाहिरिँदा त्यत्तिकै साथीहरू स्वागत गर्न आएर पुलिस नै डरायो । फोटो खिच्न हनुमानढोका लगेको, मेरा केटाहरू नहिँडी मलाई बाहिर निस्कनै दिएन पुलिसले । यसैले देखाउँछ, मेरो संयन्त्र केही भएको छैन । दुई-चारजना यताउति गए होलान्, तर त्यसले केही फरक पर्दैन । म बाघ हुँ, अरू स्याल हुन् । तपाईंसँग काम गर्नेहरूको संख्या कति छ ? म संख्या तोक्दिनँ । समय आएपछि देखिन्छ । भनेपछि राजनीति गर्ने नै भइयो अब ? भइयो । म पनि सेलिब्रेटी हो नि यार, काठमाडौंको । पुलिसका हाकिमहरू जेल भ्रमणमा आउँदा अरू सब काम छाडेर मलाई हेर्न आउने । मचाहिँ चिडियाखानाको बाघजस्तो क्या । बाटोमा हिँड्दा पनि मान्छेहरू 'ऊ त्यो हो चक्रे मिलन' भन्छन्, औंलाले देखाएर । मलाई त लाज लाग्छ यार । |