मधेशी जनअधिकार फोरम बिश्वास समूहका अध्यक्ष किशोर बिश्वासले संयुक्त लोकतान्त्रिक मधेशी मोर्चा भारतीय गुप्तचर संस्थाबाट संचालित रहेको आरोप लगाएका छन् । फागुन ९ गते राजधानीमा रिपोर्टस क्लबमा आयोजित पत्रकार सम्मेलनमा बोल्दै बिश्वासले भारतीय दुतावासको दवावमा मोर्चाले सरकारसँग सम्झौता गर्नलागेको पनि दावी गरे । बिश्वासले आफू संलग्न संघीय गणतान्त्रिक मोर्चाले संविधानसभा चुनाव पूर्ण समानुपातिक प्रणालीमा हुने निश्चित नभएसम्म आन्दोलन जारी राख्ने बताए ।
बिश्वास संलग्न ६ समूहको मोर्चाले पत्रकार सम्मेलनमा सरकारले आफूसँगको वार्तालाई गम्भीरतापूर्वक नलिएकोमा आक्रोश पनि पोखेको छ । फागुन ९ गते सरकारका मन्त्री रामचन्द्र पौडेलसँगको वार्ता बिना निश्कर्ष समाप्त भएको पनि बिश्वासको दावी थियो । वार्ताका लागि मिश्रित निर्वाचन प्रणाली खारेज हुनुपर्ने, प्रहरी दमन बन्द हुनुपर्ने र मोर्चाको घटक संघीय लोकतान्त्रिक राष्ट्रिय मंचका अध्यक्ष कमल छाराहाङलाई रिहा गर्नुपर्ने शर्त बिश्वासले सरकारसँग राखेका छन्।