अपरान्हको जदौ सहितको घोर अब्जेक्सन:
मेरो नेपाल यात्रा १२ जिल्लामा मात्रै सीमित रहेको, जसमा उपत्यकाका ३ सहित गन्तब्य जिल्लाको संख्या ७ रहेको, ४ जिल्ला ट्रान्जिट अर्थात खानपिन तथा शौचालयका साथै लोकमार्ग (राजमार्ग शब्द क्रमश: बिस्थापित हुँदैछ) जामका कारण टेकेको, अनि १ जिल्लाको भूमि समेत् नटेकेको तथ्य पहिले नै उल्लेख गरिसकेको थिएँ। अत: फोटो खिच्ने कार्य ती जिल्लाहरुमा मात्रै सम्भव भएको हुँदा "देशको कुनै भागको शेष नरहने गरी सुन्दर र सुन्दरी फोटोहरु" खिचेको भन्ने कुरा सरासर निराधार र भ्रामक भएको जानकारी गराउँदछु। साथै, बुरुशलाई रङमा चोपेर क्यानभासमा कोरेर चित्र बनाएको नभै भ्यु फाइन्डरद्वारा द्रिष्य कब्जा गरी, बटन थिची मेमोरी कार्डमा उतारेको, अनि यु एस् बि तारले क्यामरालाई कम्प्युटरसँग जोडी कम्प्युटरमा फोटो सारेको र ती मध्ये केहीलाई चौतारीमा पोस्ट गरेको हुँदा चिलिमको उन्मादमा ठुल्दाइले मेरो थर् चित्रकारमा फेर्न राख्नुभएको प्रस्तावलाई पूर्ण रुपमा अस्वीकार गर्दछु।