अन्तत: संविधानसभाको निर्वाचनको आयोजना सानदार रूपमा सफल भएको छ । हिजो ४ मंसिरमा देशैभर सर्वसाधारण मतदाताले उत्साहपूर्वक निर्वाचनमा भाग लिए । निर्वाचन आयोगले प्रारम्भिक अनुमानका आधारमा झन्डै ६५ प्रतिशत मतदाताले आफ्नो अधिकार प्रयोग गरेको बताएको छ । यसले संविधानसभा र व्यवस्थापिका संसदमा पुग्ने सदस्यले जनअनुमोदन पाएका छन् । अब छिटै जननिर्वाचित सरकार बन्नेछ । र, देशले १४ जेठ ०६९ को रातिबाट थालेको अस्थिरता र अनिश्चयको यात्राबाट मुक्ति पाउनेछ । लोकतन्त्रलाई आधुनिक राज्य र नागरिक सम्बन्धको सबैभन्दा उपयुक्त विधि मानिन्छ । र, आवधिक मतदानका माध्यमबाट जनप्रतिनिधिहरू छनोट गर्ने तथा त्यस्ता प्रतिनिधिका माध्यमबाट राज्यका नीतिहरू निर्णय प्रक्रियामा सहभागिता जनाउँछन् । नेपालमा यसपटक राजनीतिमा देखिएको अन्योल र संविधान निर्माण प्रक्रियामा यसै मतदानमार्फत जनताले हस्तक्षेप गर्नेछन्, गरेका छन् । केही महिना पहिलेदेखि नै बहिष्कारको धम्की दिने राजनीतिक समूहका आक्रामक बयानहरू, देशैभर पछिल्लो महिना गरिएका बम विस्फोट, माइन विस्फोट, उम्मेदवारमाथिका आक्रमण, मतदातालाई दिइएको धम्की, निर्वाचन प्रचारमा पुर्‍याइएको अवरोध, दशदिने बन्द र हडताल, सहज रूपमा मानिसको आवागमनमा पुर्‍याइएको अवरोध तथा निर्वाचन प्रक्रियामा समेत भएको हस्तक्षेपका बाबजुद ६५ प्रतिशत मतदान हुनुले बहिष्कारवादीको राजनीतिक पराजय भएको छ । जारी राजनीतिक प्रक्रियाले विजय पाएको तथा सबैभन्दा महत्त्वपूर्ण कुरा त लोकतन्त्रको स्थायित्व र संस्थागत गर्ने प्रक्रियाले एक खुट्किलो सफलता हासिल गरेको छ । जनताले निर्वाचनमा सहभागिता जनाएर राजनीतिक स्थिरता र परिवर्तनलाई निर्वाचनका माध्यमबाटै साकार पार्न सकिन्छ भन्ने मत पनि जाहेर गरेका छन् ।

छिटपुट घटनाबाहेक शान्तिपूर्ण रूपमा सम्पन्न भएको निर्वाचनले लामो समयदेखि काठमाडांैको एउटा पाखे विचारी समूहले निर्वाचनको सफल आयोजनाका बारेमा उठाएको प्रश्न या ठड्याएको औँलो हिजैदेखि फतक्कै गलेको छ । यससँगै खिलराज रेग्मीको सरकारको गठनबारे चलाइएका वाहियात हल्लाहरूको पनि उपचार भएको छ । केही मानिसले रेग्मी सरकारको गठनसम्बन्धी चार दलीय संयन्त्रको निर्णयलाई लिएर भारतको खेल भन्दै निकृष्ट आरोप लगाएका थिए, शक्ति पृथकीकरणको सिद्धान्तको हवाला दिँदै यस सरकारको विघटन र खारेजीका लागि अभियान चलाएका थिए । तर, राजनीतिक बाध्यताका रूपमा स्वीकार गरिएको खिलराज रेग्मीको नेतृत्वमा रहेको अन्तरिम सरकारले अनेक चुनौतीको सामना गर्दै सानदार रूपमा निर्वाचन सफल बनाइदिएको छ । यससँगै उसका बारेमा उठेका प्रश्न स्वत: असान्दर्भिक बन्न पुगेको छ । यसका लागि खिलराज रेग्मीको सरकार र समग्र सुरक्षा संयन्त्रलाई बधाई दिनैपर्ने हुन्छ ।

साथै, निर्वाचन आयोगले पनि अनेक कमी–कमजोरीका बाबजुद संविधानसभाको सफलतापूर्वक आयोजना गरेको छ । यसपटक देशैभर पहिलेका संसदीय निर्वाचनहरूका तुलनामा शान्तिपूर्ण र उत्साहजनका रूपमा निर्वाचन सफल भएको छ । यसका लागि निर्वाचन आयोग, राजनीतिक दलहरू र मतदाता सबै बधाईका पात्र बनेका छन् ।

बाँकी कुराको फैसला मतगणनाले गर्ने नै छ । हाम्रो भाग्य अहिले केही हदसम्म मतपेटिकामा कैद रहेको छ । आशा गरौँ, मतपरिणाम परिवर्तन र अग्रगमन तथा राजनीतिक स्थिरताका पक्षमा नै आउनेछ ।

http://nayapatrika.com/index.php?option=com_content&view=article&id=13288:2013-11-20-06-53-29&catid=53:2012-04-22-06-38-41&Itemid=59