Source : weeklynepal.com

http://www.weeklynepal.com/index.php?option=com_content&task=view&id=20040#Scene_1

प्रधानमन्त्रीपुत्र प्रकाशद्वारा छाती खोलेर कुकुरलाई चुम्बन!

प्रचण्डका भतिजा समीर दाहाल र छोरा प्रकाश दाहाल विभिन्न शङ्कास्पद गतिविधिमा संलग्न रहेको बालुवाटार स्रोतबाट थाहा हुन आएको छ।  
प्रचण्डको नाम लिएर भतिजा समीरले नाजायज काम गर्न लगाउने गरेको आरोप केही पीडितहरूले लगाएका छन्। उनको यो कदमबाट आजित तथा उनका विगत जान्नेहरू त बालुवाटारमा रहेको कुहिएको अण्डाले प्रचण्डलाई सखाप पार्ने भो समेत भन्न थालेका छन्। थाहा भएअनुसार समीर दाहाल अण्डाका व्यापारी हुन्। उनी कुनै समयमा चितवनको डल्लाकोटी पोल्ट्री फर्ममा काम गर्थे। त्यहीँ उनको फर्मका  
मालिककी भाञ्जी कल्पना बिसुरालसँग मायाप्रिती बसेर विवाह भएको थियो। स्रोतका अनुसार उनी २०५८ सालसम्म भोटेबहालतिर डिपो राखेर अण्डाको व्यापार गर्ने गर्थे। कारोबारको क्रममा उनले त्यस क्षेत्रका धेरै व्यापारीको रकम डुबाइदिएका थिए, जुन अझैसम्म पनि उनले तिरेका छैनन्। स्रोतका अनुसार समीरमाथि विभिन्न बैंकहरूमा गई प्रधामन्त्रीको नाम लिएर जबर्जस्ती ऋण प्रवाह गर्न नाजायज दबाब दिने, सरुवा–बढुवा गराइदिने भन्दै प्रहरी कर्मचारीहरूबाट मोटो पैसा असुल्ने तथा विदेश पठाइदिने नाममा सोझासाझाहरूबाट रकम उठाउने गरेको आरोप पनि लाग्न थालेको छ। प्रमको विदेश विभाग सल्लाहकार हीराबहादुर थापाको सल्लाहमा यिनी चल्ने गरेको बताइन्छ।
यसैगरी प्रधानमन्त्री पुत्र प्रकाशको चर्तिकला बालुवाटारभित्र निकै चर्चाको विषय बन्न पुगेको छ। प्रकाश माओवादीमा लागेका थुप्रै्र नवयुवकजस्तै एक नवयुवक हुन्। उनले पनि आफ्नो जीवन र जवानी क्रान्तिका लागि होमेका हुन्, त्यसमा शङ्का छैन। तर, उनी माओवादीका एउटा असल सिपाही मात्र होइनन्, माओवादीका सर्वोच्च नेता प्रचण्डका पुत्र पनि हुन्। माओवादीले आदर्श मान्ने गरेका माओले हिजो आफ्ना छोरालाई समेत न्यायका लागि कोरिया युद्धमा लड्न पठाएको इतिहास हँुदाहुँदै प्रकाशको सौभाग्य, क्यान्टोनमेन्टमा बस्नुपरेको छैन।  
प्रकाशका लागि अहिले सुरा, सुन्दरीहरू प्यारो लाग्न थालेको बालुवाटार स्रोतहरूले बताएका छन्। पछिल्लो समयमा प्रकाश बिहानदेखि नै सुरामा लठ्ठ पर्न थालेका छन्। कतिसम्म भने गत पुस २३ गते बुधबारमात्रै पनि उनले बालुवाटारमा नरमाइलो चर्तिकला देखाएका थिए। सूत्रहरूका अनुसार त्यस दिन उनी बिहानैदेखि फिटान थिए र करिब ७ः३० बजेतिर आफूले पालेको कुकुरको छाउरोलाई म्वाइ खाँदै भान्छाघरछेउको चौरमा 'बबाल' गरेका थिए। त्यसबेला रक्सीको नशामा उनले सर्टको टाँक खोलेर छात्ती देखाउँदै आफ्नो बुबा देशको सर्वेसर्वा भएको र कोही छ मलाई च्यालेन्ज गर्ने भन्दै नाटक देखाएका थिए। उनको त्यो चर्तिकला देखेर बालुवाटारका कर्मचारी छक्क परेका थिए। त्यस्तै चर्तिकला उनले त्यसपछि पनि पटक–पटक गरेको कुरा प्रत्यक्षदर्शीहरूले बताएका छन्।  
प्रचण्डपुत्रको चर्तिकलालाई देख्नेहरूले पारससँग उनको तुलना गर्न थालेका छन्। प्रचण्डले उनलाई सुधार्ने हो भने पुत्रमोह त्यागेर बेलैमा उनलाई अन्य जनमुक्ति सेनाहरूका साथमा क्यान्टोनमेन्टमा पठाउनुपर्ने आवाज माओवादीभित्रै उठ्न थालेको छ। यस सम्बन्धमा प्रकाश र समीरको धारणा जान्न खोज्दा उहाँहरू दुवैको फोनमा सम्पर्क हुन सकेन।