दिउँसो १ः२५ बजे चालकहरु उडान पूरा गरी अवतरणका लागि फेवा तालको आकाशमा आइपुग्दै थिए। सेदी किनारमा पाइलटहरु खस्दा घाइते होलान् भनेर रेडक्रसको प्राथमिक उद्धारको टोली पुगेको मात्र थियो। त्यही बेला फेवाताल किनारको हावाको गति असामान्य हुन थाल्यो। भुँवरी परेर आएको हावाले रुखका पात र धुलो उडाउन थाल्यो। आकाशमा उडिरहेका चालकहरु हावाको भुँवरीबाट सिधै प्रभावित बने। उडान असन्तुलित भएको देखियो। सिङ्गल उडान गरिरहेका उनीहरु फेवातालको आकाश बाहिर आउन प्रयास गरिरहेका थिए। भुँवरी परेर आएको हावाका सामु उनीहरुको केही लागेन।
सेदी किनार लक्ष्य बनाएर आएका चालक फेवातालको बीचमै खस्न थाले। पहिलो चालक खसेको १० मिनेपछि लर्खराउँदै अर्को चालक पनि फेवातालमै खसे। एवं रितले ७ चालक त्यहाँ फेवा तालमा खसे। पहिलो चालक खसेको २० मिनेटसम्म उद्धार टोली घटनास्थल आइपुगेन। फेवा तालमा खस्नेमा सबै विदेशी चालक थिए। उनीहरुका साथीहरु पौडिन फेवातालमा हेलिँदै गर्दा उद्धारका लागि डुंगाहरु पनि गए। करिब ४० मिनेटसम्म उद्धार नगरिए पनि फेवातालमा खसेका प्याराग्लाइडिङ चालकहरु पौडेर ज्यान जोगाउन सफल भए। अन्ततः निजी डुंगा तथा प्रहरीको मोटरबोटले उनीहरुलाई जीवित उद्धार गर्यो। ठूलो दुर्घटना टर्यो।
हवाई खेलकूद संस्थाको आयोजनामा प्याराग्लाइडिङ प्रि वर्ल्डकप आयोजना गरिएको हो। आयोजकले हावाले बाधा पुर्याए पनि मंगलबारको उडान कार्य ५० प्रतिशत सम्पन्न भएको जनाएको छ। प्याराग्लाइडिङ प्रि वर्ल्डकप २४ गतेसम्म सञ्चालन हुनेछ।
सबै तस्बिर : केशव थोकर
