| ||||||||||
| ||||||||||
नयाँ पत्रिका
काठमाडौँ, २९ चैत
2008-04-12,Saturday
संविधानसभा चुनावको प्रारम्भिक मतगणनामा माओवादी पहिलो शक्तिका रूपमा उभिएको छ । मतगणना जारी रहेकामध्ये ६० प्रतिशतभन्दा बढीको मतगणनामा माओवादी उम्मेदवार अगाडि छन् । कांग्रेस, एमाले र मधेसी जनअधिकार फोरमले माओवादीलाई पछ्याएका छन् ।
अघिल्ला संसदीय चुनावको जनमतमा व्यापक फेरबदल आएको प्रारम्भिक मतगणनाले देखाएको छ । कांग्रेस-एमालेका ठूला हस्तीलाई कम चिनिएका माओवादी उम्मेदवारले गम्भीर चुनौती दिएका छन् । राजधानीमा एमालेको परम्परागत पकड माओवादीले खोस्न सक्ने देखिएको छ । पछिल्लो मतगणनामा एमाले महासचिव माधवकुमार नेपाल काठमाडौंको क्षेत्र नम्बर २ मा तेस्रो स्थानमा छन् । माओवादीका झक्कुप्रसाद सुवेदी र कांग्रेसका दीपक कुइँकेल उनीभन्दा अगाडि छन् ।
माओवादी अध्यक्ष प्रचण्ड काठमाडौंको क्षेत्र नम्बर १० मा अगाडि छन् । कांग्रेसका राजन केसी र एमालेका सानुकुमार श्रेष्ठलाई उनले नजिक आउन दिएका छैनन् । उपत्यकाका अधिकांश क्षेत्रमा त्रिपक्षीय प्रतिस्पर्धाको स्थिति भए पनि धेरैजसोमा माओवादीले अग्रता कायम गरेको छ । ललितपुरको क्षेत्र नम्बर ३ मा माओवादी उम्मेदवार पम्फा भुसाल जितको नजिक छिन् । यस जिल्लाको क्षेत्र नम्बर १ मा कांग्रेस र २ मा माओवादीले झिनो अग्रता लिइरहेका छन् ।
भक्तपुरमा भने नेपाल मजदुर किसान पार्टीले आफ्नो परम्परागत वर्चश्व यथावत राख्ने देखिएको छ । सो पार्टीका अध्यक्ष नारायणमान विजुक्छे क्षेत्र नम्बर १ र सुनिल प्रजापति क्षेत्र नम्बर २ मा जितको नजिक छन् ।
यो समाचार तयार पार्दासम्म काठमाडौंका २, ६, ७, ९ र १० मा माओवादी उम्मेदवार अगाडि छन् । त्यस्तै ३, ४ र ५ मा कांग्रेसले अग्रता लिएको छ भने एमाले ८ नम्बरमा मात्र अगाड छि ।
एमालेका वरिष्ठ नेताहरू हारको संघारमा छन् । स्थायी समिति सदस्य वामदेव गौतम बर्दिया-१ मा माओवादीभन्दा पछाडि छन् । अर्का प्रभावशाली नेता केपी शर्मा ओलीले पनि अग्रता लिन सकेका छैनन् । झापा-७ मा माओवादी उम्मेदवारभन्दा पछाडि छन् । स्थायी समिति सदस्यहरू भरतमोहन अधिकारी, ईश्वर पोखरेल, युवराज ज्ञवाली, विष्णु पौडेल सबै आफ्ना क्षेत्रमा पछाडि परेका छन् । यता, बाँके-३ बाट उठेका कांग्रेसका कार्यबाहक सभापति सुशील कोइरालाको अवस्था नाजुक छ । सो क्षेत्रमा मधेसी जनअधिकार फोरमले अग्रता लिइरहेको छ भने कोइराला हालसम्म तेस्रो छन् ।
विगतमा सहजै जित्ने गरेका कांग्रेस उपसभापति तथा शान्तिमन्त्री रामचन्द्र पौडेल तनहुँमा कडा प्रतिस्पर्धामा छन् । उनलाई माओवादीका डम्बरबहादुर विश्वकर्माले चुनौती दिइरहेका छन् । कांग्रेसका वरिष्ठ नेता शेरबहादुर देउवा भने डडेल्धुरा र कञ्चनपुर दुवै क्षेत्रमा अग्रस्थानमा छन् ।
माओवादीतर्फ भने अधिकांश केन्द्रीय नेताहरू जित्ने स्थितिमा छन् । चितवनबाट रामबहादुर थापा बादल र दाङबाट कृष्णबहादुर महरा जितको नजिक छन् । ती दुवै जिल्लाका अन्य क्षेत्रहरूमा पनि माओवादी प्रभावशाली देखिएको छ । मकवानपुर र बर्दियाका सबै स्थानमा माओवादी अगाडि छ । तराईका केही जिल्लामा मधेसी जनअधिकार फोरमले बलियो उपस्थिति जनाउने संकेत देखिएको छ । बाँके, मोरङ, सुनसरीलगायत जिल्लामा फोरम उम्मेदवार कडा प्रतिस्पर्धामा छन् । फोरमका अध्यक्ष उपेन्द्र मोरङ र सुनसरी दुवै जिल्लामा अग्रस्थानमा छन् । प्रधानमन्त्री पुत्री तथा विना विभागीयमन्त्री सुजाता कोइराला सुनसरी-५ मा यादवभन्दा पछि छिन् ।
You can also log in using your Facebook
