अर्थमन्त्री वर्षमान पुनले आगामी आर्थिक वर्षको बजेट माओवादी केन्द्रतिर नभई जनतातिर ढल्केको बताएका छन् । बुधबार संसद् भवन बाहिर सञ्चारकर्मीहरूसँग यस्तो प्रतिक्रिया दिएका हुन् । सत्ता गठबन्धन एमालेका अध्यक्ष केपी शर्मा ओलीले बजेट माओवादीतिर ढल्केको भन्दै आफ्नो संसदीय दलको बैठकमा टिप्पणी गरेका थिए ।
नेपाली कांग्रेस महामन्त्री गगनकुमार थापाले सरकार भ्याट छुटमा उल्टो बाटो हिँडेको आरोप लगाएका छन् । प्रतिनिधिसभामा आगामी आर्थिक वर्ष २०८१/०८२ को विनियोजन बजेटको विषयमा भएको छलफलमा बुधबार बोल्दै महामन्त्री थापाले सरकार भ्याट छुटको सूची घटाउँदै जानुपर्नेमा उल्टो बाटो हिँडेको आरोप लगाएका हुन् ।
भाषा आयोगका अध्यक्ष गोपाल ठाकुरले मातृभाषा दिनप्रतिदिन ओझेलमा पर्दै गएको बताएका छन् । अंग्रेजी भाषाप्रति आममानिसको मोह बढेकाले आफ्नै भाषा ओझेलमा पर्दै गएको ठाकुरको भनाइ छ ।
शिक्षा, विज्ञान तथा प्रविधिमन्त्री एवं राष्ट्रिय स्वतन्त्र पार्टीकी सांसद सुमना श्रेष्ठले आफूलाई लक्षित गर्दै एमाले अध्यक्ष केपी शर्मा ओलीले दिएको अभिव्यक्तिको जवाफ दिएकी छिन् । उनले अध्यक्ष ओलीको नाम नलिइकन उनको विवादसँग जोडिएको विषयमा सामाजिक सञ्जाल एक्समा जवाफ लेखेकी छन् ।