२३ सभासद् अमेरिकातिर 24/06/2010 06:49:00 Naya Patrika Font size: काठमाडौं, ९ असार नेपालभित्र चरम असन्तुष्टि भए पनि अमेरिका भ्रमणका लागि राजनीतिक दलबीच सहमति भएको छ । देशभित्र दलीय सहमति नभए पनि विदेश जाने विषयमा सहमति भएपछि २३ सभासद् बिहीबार अमेरिका उड्दै छन् । दुई गैरसरकारी संस्थाले नेपाली सभासद्लाई संविधान निर्माणलगायतका विषयमा प्रशिक्षण दिन अमेरिका लग्दै छन् । 'बोस्टर्न नेगोसिएसन एन्ड स्टेट बिल्डिङ प्रोगाम फर नेपाली पोलिटिकल लिडर' विषयक कार्यक्रममा माओवादी, एमाले, कांग्रेस, फोरम, तमलोपा र सद्भावनालगायत पार्टीका सभासद् अमेरिका जान लागेका हुन् । बिहीबार अमेरिका उड्ने सभासद्ले १० दिन त्यहाँ बिताउनेछन् । कार्यक्रममा माओवादीका चार, कांग्रेस र एमालेका तीन/तीनजना नेतासहित २३ जना सहभागी हुनेछन् । प्रमुख राजनीतिक दलका नेताहरू संविधान निर्माणसम्बन्धी सो कार्यक्रममा जाँदै छन् । उनीहरूको भिसादेखि टिकटसम्म निश्चित भएको छ । गल्फ एयरको जिएफ २६१ को उडानबाट उनीहरू बिहीबार साँझ सात बजे अमेरिकातर्फ उड्दै छन् । अमेरिकास्थित करुना सेन्टर फर पिस बिल्डिङ र नेपाली संस्था द्वन्द्व व्यवस्थापन शान्ति तथा विकास प्रतिष्ठान  -आइसिपिडी) ले यस्तो भ्रमण गराउन लागेका हुन् । भ्रमणलाई अमेरिकी सरकारको स्टेट डिपार्टमेन्ट -विदेश विभाग) ले पनि सहयोग पुर्‍याएको छ । आइसिपिडी नेपाली गैरसरकारी संस्था हो । यो सन् २००२ मा स्थापना भएको हो । त्यस्तै करुना सेन्टरले शान्ति निर्माणका लागि आफ्नो संस्था सन् १९९४ मा स्थापना भएको जनाएको छ । द्वन्द्व प्रभावित राष्ट्रहरूमा शान्ति निर्माणका पक्षमा काम गर्दै आएको संस्थाले जनाएको छ । आइसिपिडीका अध्यक्ष डा. पूर्णकान्त अधिकारीले भने यस विषयमा प्रतिक्रिया बिहीबार मात्र दिने बताए । 'म भोलि -बिहीबार) बताउँछु, आज बताउन सक्ने अवस्थामा छैन,' नयाँ पत्रिकाले भ्रमणबारे मागेको प्रतिक्रियामा उनले भने । तर, अमेरिका जाने तयारीमा रहेका एक  सभासद्ले आफ्नो भिसा लागेको र  बिहीबार कार्यक्रममा जान लागेको पुष्टि गरे । २५ जुनदेखि ४ जुलाईसम्म उनीहरूको भ्रमण हुनेछ । कार्यक्रमपछि टोली जुलाई ५ मा काठमाडौं र्फकनेछ । स्रोतका अनुसार टिकटलगायतका  काम जेम्स ट्राभल काठमाडौंले गरेको छ । भ्रमणमा जाने नेताहरूका लागि हरेक दिनको एजेन्डासमेत तय गरिएको छ । शनिबार र आइतबार समूह निर्माण र अन्तरपार्टी सम्बन्ध विकास, सोमबारदेखि शुक्रबारसम्म समाधान हुन बाँकी रहेका -संघीयता, सीमान्तकृत समुदायको अधिकार, सेना समायोजन र नयाँ संविधानमा सहमति जनाउने) विषयमा नेपाली सभासद्हरूलाई अमेरिकामा प्रशिक्षण दिइनेछ । मंगलबार नेपाली प्रतिनिधिमण्डलले अमेरिकी सिनेटको प्रतिनिधिमण्डलसँग छलफल गर्ने कार्यक्रम छ । कार्यक्रममा डा. पाउला गि्रन, वलिभा स्टोकस डेरियर, आइसिपिडीका अध्यक्ष डा. पूर्णकान्त अधिकारी, आइसिपिडीका महासचिव विष्णु भुसाल र इलियन बविटले प्रशिक्षण दिनेछन् । यसबाहेक सम्बन्धित विषयमा अन्तर्राष्ट्रिय विज्ञहरूले पनि कार्यपत्र पेस गर्नेछन् । कार्यक्रममा सहभागी हुन माओवादीका सिपी गजुरेल, टोपबहादुर रायमाझी, अग्नि सापकोटा र पम्फा भुसाल, कांग्रेसका अर्जुननरसिंह केसी, रमेश लेखक र सुप्रभा घिमिरे, एमालेका प्रदीप ज्ञवाली, लक्की शेर्पा र सपना प्रधान, तमलोपाका हृदयेश त्रिपाठी, सद्भावनाका अनीलकुमार झालगायतका नेता अमेरिका जाँदै छन् । संविधान निर्माणसम्बन्धी तालिममा जाने अरू सबै सभासद् भए पनि कांग्रेसका अर्जुननरसिंह केसी भने सभासद् होइनन् ।  अमेरिका उड्न तयार रहेका नेता तथा सभासद्लाई अमेरिकी दूतावासले बुधबार साँझ 'डिनर' खुवाएको थियो । 'हो दूतावासले हामीलाई बिदाइ भोज दिएको हो, हामी तालिमका लागि जाँदै छौँ,' एक सभासद्ले भने ।