कांग्रेसका ६८ निर्णय ६५ अलपत्र Font size: बालकृष्ण अधिकारी 22/07/2009 01:44:00 एक वर्षयता र्काग्रेसले गरेका निर्णयमध्ये राष्ट्रपति, उपराष्ट्रपति र संविधानसभा अध्यक्षलाई शुभकामना दिने निर्णय कार्यान्वयन भए अन्य निर्णय अलपत्र छन् नयाँ पत्रिका काठमाडौं, ६ साउन कांग्रेसले एक वर्षमा गरेका अधिकांश निर्णय अलपत्र छन् । ११ साउन, ०६५ देखि ८ असार, ०६६ सम्म कांग्रेसका १२ बैठकले ६८ वटा निर्णय गरेका थिए । तर, राष्ट्रपति, उपराष्ट्रपति र संविधानसभाका अध्यक्षलाई बधाई दिनेबाहेकका निर्णय कार्यान्वयन भएका छैनन् । एक वर्षयता कांग्रेस सभापति गिरिजाप्रसाद कोइरालाको निवासमा दर्जनौँ अनौपचारिक बैठक भएका छन्, त्यसको लेखाजोखा छैन । तर, एक वर्षमा कांग्रेसले औपचारिक बैठक मात्र १२ पटक गरेको छ, त्यसमा दुईवटा आकस्मिक थिए । कांग्रेस केन्द्रीय समितिले गरेका अधिकांश निर्णय 'माइन्युट' मा मात्र सीमित छन् । पार्टीको १२ औँ महाधिवेशन आगामी भदौभित्र गर्ने, सबै जिल्लामा पार्टीको भावनात्मक एकताका लागि कार्यक्रम गर्ने, पार्टीका विभागहरू गठन गर्नेलगायतका निर्णय अलपत्र छन् । राष्ट्रपति डा. रामवरण यादव, उपराष्ट्रपति परमानन्द झा र संविधानसभा अध्यक्ष सुवास नेम्वाङलाई बधाई दिने, निर्वाचनमा सहयोग गर्ने सबै राजनीतिक दललाई धन्यवाद दिनेजस्ता निर्णय भने कार्यान्वयन भएका छन् । गत वर्ष ११ देखि १३ साउनसम्म बसेको कांग्रेस केन्द्रीय समितिको बैठकले राष्ट्रपति, उपराष्ट्रपतिसहित संविधानसभाका अध्यक्षलाई बधाई दिने निर्णय गरेको थियो । त्यही बैठकले निर्वाचनमा सहयोग गर्ने राजनीतिक दलहरूलाई धन्यवाद दिएको थियो । सो बैठकले मुलुकको राजनीतिक चुनौतीको सामना गर्न उपसभापति रामचन्द्र पौडेललाई अवधारणा-पत्र तयार गर्न भनेको थियो । अवधारणापत्र तयार पनि भयो, तर त्यसका बारेमा पार्टीभित्र छलफलसम्म भएको छैन । २९ र ३० साउनको अर्को बैठकले राजनीतिक दलहरूबीच सहमति कायम हुन नसकेपछि पार्टीका तर्फबाट व्यवस्थापिका संसद्मा प्रधानमन्त्रीको उम्मेदवारी दिने निर्णय गरेको थियो । उसले त्यसका लागि एमाले, मधेसी जनअधिकार फोरमलगायतका दलहरूसँग परामर्श थाल्ने भनेको थियो, तर त्यो पनि कार्यान्वयन भएन । ९ देखि २१ भदौसम्म बसेको बैठकले आगामी -२०६६) भदौभित्रमा पार्टीको १२ औँ महाधिवेशन गर्ने निर्णय गरेको थियो । तर, एक वर्ष बित्न लाग्दा पनि महाधिवेशनको मितिसमेत तोकिएको छैन । जिल्ला र क्षेत्रमा यथाशीघ्र अधिवेशन गर्ने भनिए पनि अहिलेसम्म क्रियाशील सदस्यता वितरणसमेत सुरु भएको छैन । केही जिल्लामा सदस्यता वितरणका लागि सदस्यता-पत्र पठाए पनि आन्तरिक विवादका कारण अहिलेसम्म वितरण सुरु भएको छैन । कांग्रेस सभापति गिरिजाप्रसाद कोइराला, कार्यवाहक सभापति सुशील कोइरालासहितका नेताले परिवर्तित राजनीतिक अवस्थामा केही समय सरकार गठनमा सक्रिय रहनुपरेकाले महाधिवेशनको तयारीमा लाग्न नसकेको बताएका छन् । सभापति कोइरालाले पार्टीको १२ औँ महाधिवेशन आगामी मंसिरमा गर्ने संकेत दिएका छन्, तर त्यसको औपचारिक टुंगो लागेको छैन । कांग्रेसले गत मंसिर-पुसमा राष्ट्रिय जागरण अभियान सञ्चालन गर्ने निर्णय गरेको थियो । त्यस क्रममा सभापति कोइराला केही ठाउँका सभालाई सम्बोधन गर्न पनि पुगेका थिए । तर, उनी अस्वस्थ भएपछि अभियान नै बीचमा अलपत्र परेको छ । भदौ मसान्तभित्रै पार्टीको केन्द्रीय विभाग र समितिहरू गठन गर्ने निर्णय भएको थियो । तर, कांग्रेसको कुनै पनि समिति र विभागहरू गठन भएका छैनन् । भ्रातृसंगठनहरूको विवादलाई समाधान गर्न पार्टीले गठन गरेको संयन्त्रले उनीहरूसँग छलफल गरे पनि अहिलेसम्म कुनै निर्णय गर्न सकेको छैन । ९ र १० फागुनमा बसेको बैठकले नयाँ संविधान बनाउने कार्यलाई केन्द्रमा राखी पार्टीका सबै तह र इकाइबाट सुझाब संकलन गर्ने भनेको थियो, तर कार्यान्वयन भएन । सबैजसो निर्णय अलपत्र परे पनि कांग्रेस उपसभापति गोपालमान श्रेष्ठ भने पार्टीका निर्णय कार्यान्वयन भएका छैनन् भन्ने अस्वीकार गर्छन् । मुलुकको विषम राजनीतिक परिस्थितिका कारण कतिपय निर्णय कार्यान्वयनमा ढिलाइ भएको उनको टिप्पणी छ । 'केन्द्रीय समितिले गरेका धेरै निर्णय कार्यान्वयन भइसकेका छन्, तर महाधिवेशनलगायत संगठन निर्माणका काममा केही ढिलाइ भएको छ,' उनले भने ।