आयल निगमका कार्यकारी निर्देशक खड्कामाथि अख्तियारको छानविन

५ मंसिर, काठमाडौं । नेपाल आयल निगमका कार्यकारी निर्देशक गोपालबहादुर खड्काको तोक आदेशमा भलवारी डिपोले काठमाडौंको निजी पम्पलाई तेल दिएको पाइएपछि अख्तियार दुरुपयोग अनुसन्धान आयागले छानविन थालेको छ ।

भलवारी डिपोले काठमाडौंको हामा आयल स्टोरलाई १२ हजार लिटर डिजेल दिएको पाइएपछि रुपन्देही प्रहरीले अनियमितताको आशंकामा बिहीबार राति नै ट्यांकर नियन्त्रणमा लिएको थियो ।

तर, कार्यकारी निर्देशककै निर्देशनमा तेल दिइएको पाइएपछि खड्का अनुसन्धानमा तानिएका हुन् । स्रोतका अनुसार अख्तियारले शुक्रबार नै खड्कालाई बोलाएर भलवारी काण्डबारे सोधपुछ गरेको छ ।

क्षेत्रीय कार्यालय भैरहवाले थप अनुसन्धान गरिरहेको आयोगका प्रवक्ता कृष्णहरि पुष्करले बताए ।

हामा आयल स्टोरले रिङरोड विस्तार गर्दै आएको संघाई ग्रुपलाई भन्दै भलवारी डिपोबाट डिजेल दिन नियमलाई पत्र लखेको थियो । जसलाई कार्यकारी निर्देशन खड्काले तोक लगाइदिएका छन् ।

तर, नेपाल आयलका असधकारीहरुका अनुसार कुनै डिपोलाई काठमाडौंका पम्पलाई तेल दिने कुनै अधिकार छैन । मिलेमतोमा कालोबजारी गर्न लागेको आशंका बढेपछि अख्तियारले छानविन थालेको छ ।