बामदेव गौतमलाई खुलापत्र

श्री बामदेव गौतम,
उपप्रधान तथा गृहमन्त्री नेपाल सरकार ।

गृहमन्त्री गौतम ज्यू, तपाईले ९ बैशाखमा संसदको सार्वजनिक लेखा समितिमा गएर दिनुभएको जवाफ समाचार मार्फत सुनेपछि तपाईको नाममा केही नलेखि चित्तै बुझेन । खासगरी तपाईंले नेपालीहरुलाई अंग्रेजी नजान्ने, प्रविधि नजान्ने, सवैभन्दा धेरै भ्रष्ट, अर्राष्ट्रि«य र स्वाठको रुपमा गर्नुभएको चित्रणले मेरो आँङ सिरिंग भयो । देशको उपप्रधान तथा गृहमन्त्री मात्र होइन, एउटा कार्यवहाक प्रधानमन्त्रीले किन आफ्नै देशका जनतालाई भ्रष्ट, अर्राष्ट्रि«य र स्वाठ भनेर गौरव गर्दैछ भन्ने कुरा नबुझेको हुनाले नै पत्र लेख्दै छु ।

भीसा प्रोसेसिङको काम विदेशीलाई दिनुपर्छ भनेर तपाईले धेरैपटक भाषण गरिसक्नु भयो । किनभने तपाईको तर्क अनुसार नेपालीहरु प्रविधि जान्दैनन् । इन्टरनेट चलाउन जान्दैनन् । अंग्रेजी बोल्न सक्दैनन् । यही कारण विदेशीलाई यो काम सुम्पनै पर्छ भन्ने तपाईको तर्क छ । तर, तपाईको तर्क हावादारी छ भनेर कम्यूटरका विज्ञ नेपालीहरुले पत्रकार सम्मेलन गरेर नेपाल र नेपालीको यथार्थ सुनाए र सुनाईरहेका छन् । अंग्रेजीका विज्ञ नेपालीहरु पनि आफ्ना कुरा राख्न बाध्य छन् । यतिहुँदा पनि तपाई आफ्नो मतलवी तर्क दोहो¥याई रहनुभएको छ । अझ तपाईले भन्नुभयो, “यो कामको विरोधगर्नेहरु राष्ट्रघाती हुन् ।” यस्तो संवेदनशील काम विदेशीलाई जिम्मा लगाउँदा सही हुन्न भनेर चिन्ता गर्नेहरुलाई राष्ट्रघाती भनेर तपाईले गरेको गाली आम नेपाली माझ स्मरणिय रहिरहने पक्का छ ।

तपाईका यी सवै प्रदर्शनको पछाडिको कारण, भीसा प्रोसेसिङकोलागी तपाईले तयार गर्नुभएको १ सय ५० करोडको प्रपोजल रहेछ भनेर बुझ्न केही समय लाग्यो । तर नेपाली विज्ञहरुले तपाईको १ सय ५० करोडको प्रपोजलको काम जम्मा १ करोडमा पुरा गर्न सकिन्छ भनेर हिसाव निकालिदिएका छन् । तर पनि तपाई आफूले गर्न चाहेको कामलाई पवित्र भन्न छोड्नु भएको छैन । तपाईको यस्तो अन्धढिप्पी देखेर मेरो शरीरमा लाजका काँडा उम्रेका छन् ।

हे उपप्रधानमन्त्री, तपाईले भन्नु भएछ, “सवैभन्दा धेरै भ्रष्ट नेपालीहरु छन् । ९८–९९ प्रतिसत नेपाली भ्रष्ट छन् ।” तर, कुन नेपाली भ्रष्ट छन् भनेर तपाईले भन्न खोज्नु भएको हो, मैले जति सोच्दा पनि बुझ्न सकिनँ । ५० डिग्री तापक्रम खेपेर खाडीमा काम गर्ने युवाहरु भ्रष्ट छन् ? कि जाजरकोट र कालिकोटमा स्वाईन फूल्लुले आक्रान्त नेपालीलाई भ्रष्ट भन्न खोज्नु भएको हो ? तमाम गाउँमा बस्ने सोझा नेपाली पक्कै भ्रष्ट छैनन् होला ? कर्णालीका जनताले पनि भ्रष्टाचार गरेको सुनिएको छैन । लाखौं बेरोजगारहरुले चाहेर पनि भ्रष्टाचार गर्न सक्दैनन् । हालैमात्र कोरियाजान फारम भर्ने वा विदेसिन खुट्टा उचालेर बसेका लाखौं युवाहरुलाई भ्रष्ट भन्न खोज्नु भएको हो त ? होइन भने कुन नेपालीलाई भ्रष्ट भन्न खोज्नु भएको हो ? अड्कल काट्न सकिएन । तपाईं जस्ता सीमित नेता र पदीय ब्यक्तिहरुले गरेको कामको कलंकीत टीका किन ९९ प्रतिसत नेपालीलाई लगाईदिन खोज्दै हुनुहुन्छ, यो बुझ्न नसकिने आरोप भएको छ ।

तपाईले यस्तो बकबास गरेको सुनेपछि मलाई ०५४ सालमा एमालेले खुलामञ्चवाट तपाईलाई इतिहासकै सवैभन्दा ठूलो भ्रष्ट भनेर घोषणा गरेको स्मरण भयो । आजका मितिसम्म तपाईंले त्यस घोषणाको खण्डन समेत गर्नु भएन । अझ प्रमुख घोषणाकारलाई केही समयअघि सल्लाहकार समेत वनाएर पुरस्कृत गर्नुभयो । आफूमात्र होइन, सम्पूर्ण नेपाली भ्रष्ट छन् भनेर देखाउने तपाईको नियत बुझेर म अवाक छु ।

तपाईको ब्यक्तित्वका वारेमा मैले धेरै अघि सुन्ने, पढ्ने र बुझ्ने मौका पाएको थिएँ । ८ कक्षा पढेर भारतीय सेनामा जागिर खान गएको । ट्रनिङ पुरागर्न नसकेर भागेर आएको । त्यसपछि कतै टेक्ने–समाउने ठाउँ नभएपछि पार्टीमा सदस्यता लिएको र, आजका मितिमा आइपुग्दा ठूलो र शक्तिशाली नेता भएको । तपाईंको नेतागिरी प्रति एमालेका तत्कालिन पार्टी महासचिव मदन भण्डारीको एउटा कहावतको पछिल्लो हरफ संझन्छु, “वामदेव हावी भएभने पार्टी धुलो हुन्छ” भनेको । तर अहिले त तपाईं पार्टीमा मात्र होइन देशैमा हावी हुनु भएको छ । त्यसकारण भगवान पशुपतिनाथले सद्बुद्धि दिउन भनेर कामना गर्नु वाहेक मसँग अर्को उपाय छैन । मलाई यो संझेर उदेख लाग्छ कि पटक–पटक तपाईंलाई नै पार्टीले किन गृहमन्त्री बनाउँछ ? र, यत्तिका पटक गृहमन्त्री हुँदा तपाईले देश र जनताको पक्षमा कतिवटा सिन्को भाँच्नु भयो ? एमालेजनसँग नै यस प्रश्नको जवाफ छैन ।

हे यो देशका शक्तिशाली नेता, तपाईं एउटा सर्वहारा नेतावाट करोडपती बनेको कुरामा मेरो धेरै टाउको दुखाई छैन । सहीदका छोराछोरी पढाउने कोटामा तपाईले आफ्ना छोरालाई पढाउन चीन पठाएको कुरा पनि नेपालीले भुली सके । तपाईको छोरोले हिराको ब्यापार गर्छ, भन्ने समाचारप्रति पनि मलाई चासो छैन । तपाईं हरेक पटक गृहमन्त्री बन्दा प्रहरी सरुवा–बढुवा देखि एयरपोर्टमा मच्चिने मनपरीलाई पनि मैले भारीगरी मनमा राखेको छैन । पटक–पटक सुन काण्डमा तपाईको नाम मुसिदा समेत मैले तपाईलाई केही लेखेको थिईन । तर आज जव तपाईले पौने तीन करोड नेपालीलाई नालायक बनाएर चित्रण गर्ने धृष्टता गर्नु भयो, त्यसपछि केही नलेखी धरै पाईंन । आम नेपालीलाई नालायक वनाउँदा तपाईंलाई के फाईदा हुने हो ? देशलाई के फाईदा हुने हो ? वा तपाईको पार्टीलाई कस्तो फाईदा पुग्ने हो ? कृपया जवाफ दिनु होला । यो निवेदकलाई नभएपनि नेपाली जनताका नाममा जवाफ दिनुहोला । धन्यवाद ।

प्रेषक
दिवस गुरागाईं
नेपाली नागरिक
२०७२।०१।१०
हाल –जि. गोर्खा