ऊ हाँसी।

०

हाम्रो वार्तालाप सकियो। बाहिर अघि हामीलाई एकान्त दिनेले नै हाम्रो एकान्त बिथोले। सप्पै चलाइएको बारुलाको गोलाबाट निस्कने माहुरीझैं हुरुरु भित्र छिरे।

जान चैं एरेन्ज म्यारिजका लागि भनेर केटी हेर्न गएको थिएँ। तर लभ पर्दियो। अब उसको जवाफ कुर्नु थियो। यदि उसले मानी भने म भन्न सक्नेछु हाम्रो लभ म्यारिज हो भनेर।

‘मलाई केटी मन पर्‍यो।’ तिनीहरूको घरबाट बाहिर निस्कँदै गर्दा मैले साथीलाई यही कुरा भनें।

उसले एकपल्ट हाँस्दै भन्यो, ‘उसोभए अब दिदी चैं को बूढासित उसकी दिदीको हात नमागे भो!’

मलाई पनि हाँस उठ्यो।

०

झरी धेरै नै मन्द भैसकेको थियो।

‘चिया!’ टेबलमा चिया ल्याएर मेरी श्रीमतीले राखिदिई। चस्मा खोलेर एकपल्ट उसलाई हेरें।

अनि भनें, ‘धन्यवाद सत्रौं केटी।’

ऊ मुस्कुराई। अनि भनी, ‘यहाँलाई स्वागत छ दसौं केटा।’