? 
अस्तायो एनबी समूह
आफ्नो कम्पनीको हाउजिङ्गका घर बनाउने डकर्मी र सिकर्मीदेखि उच्च राजनीतिज्ञ तथा प्रशासकलाई विभिन्न प्रलोभनमा पारेर जनताको निक्षेप दुरुपयोग गर्दै आएको एनबी समूहका दाजुभाई अझै पनि असफलताका वाबजूद विद्यमान समस्याबाट उम्कन जस्केलाबाट विभिन्न प्रयास गरिरहेका छन्।
विगतमा अदालतदेखि प्रहरीसम्मलाई आफ्नो पक्षमा राख्न सफल लक्ष्मीबहादुर र चण्डी ढकाललाई अहिलेसम्म पनि प्रहरी प्रशासनले आँखा चिम्लेर काँध हालेको स्पष्ट देखिएको छ। दुबैलाई आफ्नो पक्राउ सूचीमा राखेको दाबी गर्ने प्रहरी प्रशासनले श्रेष्ठ परिवारलाई केही सीमित आरोप लगाए पनि ढकाललाई भने हालसम्म कुनै कसुर लगाइएको औपचारिक रुपमा सार्वजनिक गरेको छैन।
एनबीको चुकुल कहिले र कसरी खुस्क्यो?
पछिल्लो डेढ वर्षदेखि धराशायी अवस्थामा पुगेको एनबी समूह र एलबी दाजुभाईको जोड घटाउ नमिल्नुमा बदलिँदो राजनीतिक, आर्थिक र सामाजिक अवस्था नै हो। अर्कोतर्फ मुलुकको विकराल असन्तुलित वित्तीय अवस्थाले पनि उनीहरूलाई प्रक्षेपण गरे बमोजिमको आर्थिक सफलता दिलाउन नसकेको स्वयम् राष्ट्र बैंकका अधिकारीहरूले अनुमान गरेका छन्।
सरकारी निकायका जिम्मेवार अधिकारीहरूलाई फकाएर काम लिने गरेको एनबी समूहले अन्तमा धम्काउने गर्दथ्यो। त्यत्तिले पनि नपुगेमा अख्तियार दुरुपयोग अनुसन्धान आयोगका उच्च पदाधिकारी वा अनुसन्धान अधिकृतलाई प्रयोग गरेर सरकारी उच्च अधिकारीको हुर्मत लिएका विभिन्न घटनाक्रमले देखाइसकेको छ। कथमकदाचित ती कार्य गर्न नभ्याएको अवस्थामा उनीहरूले जिल्लादेखि विशेष अदालत र यदाकदा सर्वोच्च अदालतसम्मका केही भ्रष्ट भनेर चिनिएका न्यायाधिशका आडमा अन्तरिम आदेश तथा निशेधाज्ञा जारी गरेर भएपनि आफ्नो काम फत्ते गर्ने गरेका थिए। तर, पछिल्लो दुई वर्षमा अदालत र न्याय क्षेत्रमा भएको उथलपुथल र भ्रष्ट न्यायाधिशहरूमाथिको प्रहारले एनबीको च्यानल पनि छरपष्ट हुन पुग्यो।
उता अख्तियार दुरुपयोग अनुसन्धान आयोगमा तत्कालीन प्रमुख आयुक्त सूर्यनाथ उपाध्यायको कार्यकालपछि एनबी समूह र एलबी श्रेष्ठ दाजुभाईले दर्जनौं सरकारी अधिकारीलाई बयान र मुद्दाको नाममा हायलकायल पारेर आफ्नो काम गराएका थिए। यसमा आयोगका कार्यवाहक प्रमुख आयुक्त ललितबहादुर लिम्बुले श्रेष्ठ दाजुभाइको योजनालाई हरतरहले सघाएका थिए। सहयोगको निम्ति समूहले लिम्बुलाई करोडौं रुपैयाँ नजराना बुझाएका थिए भने उनको छोरीलाई एनबी बैंकमा जागीर दिलाएका थिए।
उता नेपाल राष्ट्र बैंकका तत्कालीन गभर्नर हरिशंकर त्रिपाठी, सत्यन्द्रप्यारा श्रेष्ठ र कार्यकारी निर्देशक राजनसिंह भण्डारीलाई अख्तियारको आडमा विशेष अदालतमा मुद्दा लगाएर आफ्नो स्वार्थ पूरा गराउन खोजेका बखत अवरोध देखिएको भन्दै बैंकका तत्कालीन एकजना निर्देशकलाई समेत अख्तियारमा उजुरी हालेर हायलकायल बनाएका थिए। पछि तिनै गभर्नर र कार्यकारी निर्देशकले सर्वोच्च अदालतबाट र निर्देशकले स्वयम् अख्तियारबाट सफाई पाएर बैैंकमा आ–आफ्नो जिम्मेवारी सम्हालेपछि एनबी समूह र उसका प्रवर्द्धकहरूलाई गम्भीर धक्का लागेको हो। आजको परिणाम त्यही धक्काको निरन्तरता मात्रै हो।
नेपाल राष्ट्र बैंकका तत्कालीन गभर्नर, कार्यकारी निर्देशक र निर्देशकलाई अख्तियार र अदालतसम्म पुर्याउन एनबी समूहलाई सहयोग गर्ने नेपाल राष्ट्र बैंकका एकजना निर्देशक भने यतिखेर पनि केन्द्रीय बैंकमा ठाँटका साथ आफ्नो रवाफ देखाइरहेका छन्। गत वर्ष मात्र श्रेष्ठ दाजुभाइले वर्तमान गभर्नरसँग घाँटी जोडेर रात्री भोज गरेको प्रमाणसहितको समाचार सार्वजनिक हुनुले नेपाल राष्ट्र बैंकको उच्च नेतृत्व अझै पनि एनबी समूह र एलबी दाजुभाइलाई जोगाउने काममा लागेको हुनसक्ने आशंका गरिएको छ।
त्यसैगरी अर्बौं रुपैयाँ घरजग्गामा लगानी गरेको उक्त समूहले प्रक्षेपण गरे बमोजिम प्रतिफल प्राप्त गर्न नसक्नु पनि पतनको अर्को कारण बन्न पुगेको हो। चिकित्सा क्षेत्रका डाक्टरहरूलाईसमेत नक्कली योजनामा सामेल गराएर वित्तीय अपराध गरेका श्रेष्ठ दाजुभाईलाई हरिसिद्धि क्षेत्रका नागरिकले पुर्याएको अवरोधले पनि दाँतमा ढुङ्गा लागे झैं बन्यो।
तत्कालीन प्रधानमन्त्री गिरिजाप्रसाद कोइरालालाई करोडौंको प्रलोभन दिएर कौडीको भाउमा हरिसिद्धि ईंटा टायल कारखानाको सयौं रोपनी हत्याएको एनबी समूहले आफूले बनाएको योजना अनुसार उक्त जग्गाको बिक्री र प्रयोग गर्न नसक्नुले पनि उनीहरूको रोडम्यापमा धक्का पुगेको हो। चिकित्सक, पूर्व गभर्नर, योजना आयोगका पूर्वउपाध्यक्ष, पूर्व मुख्य सचिव, पूर्व सचिवलगायतका उच्च अधिकारीहरूलाई विभिन्न बहानामा आफ्नो पक्षमा काम गर्न बाध्य बनाएको श्रेष्ठ दाजुभाईले तत्कालीन नेपाल श्रीलंका मर्चेण्ट बैंकका सञ्चालक र दर्जन कर्मचारीलाई समेत ऋणी बनाएर ठगेका विवरण सार्वजनिक भइसकेका छन्।