आमाको नभएर बाबुको कारणले छोरा या छोरीको जन्म हुन्छ भन्ने कुरा चिकित्सा विज्ञानले बर्षौंअगाडी प्रमाणित गरिसके पनि छोरी जन्माएको निहुँमा सयौं महिला श्रीमान र परिवारवाट नै विभिन्न खाले हिँसाको शिकार बनिहरेका छन् । यस्तै घरेलु हिँसाको पछिल्लो सिकार भएकी छन् झापाको तोपगाछी गाविस ८ निवासी मोहन हरिजनकी २१ वर्षिय छोरी ज्योति हरिजन । उनलाई छोरा नजन्माएको भन्दै श्रीमानले जवरजस्ती मट्टितेल छर्केर शरीरमा आगो लगाइदिए ।
सँगै बाँच्ने, सँगै मर्ने पनि अग्निमा सात फेरा लगाएर विहे गरेको आफ्नै लोग्नेले आगो लगाएपछि शरीर जलेर मरणासन्न अवस्थामा पुगेकी ज्योति अहिले उपचारको अभावमा ओछ्यानमा छटपटाइरहेकी छन् ।

२०६७ साल असार २० गते झापाकै चकचकी गाविस, वडा नम्बर-२ निवासी साजन हरिजनसँग परम्परागत विवाह वन्धनमा वाँधिएकी ज्योतिले गत वैशाख २३ गते छोरी जन्माएकी थिइन् । उनका अनुसार छोरी जन्मिएलगत्तै श्रीमानले कुटपिट गर्ने लगायतत विभिन्न शारीरिक र मानसीक यातना थाले । ‘सवैले छोराको आशा गरेका थिए, किन छोरी जन्माइस् भन्दै कुटपिट गरिन्थ्यो’, उनले व्यथा सुनाइन्, ‘यसै क्रममा गत असार २० गते शनिवार राति अन्दाजी १० वजेको थियो, सुत्ने तरखरमा थियौं । श्रीमानले वत्तीको मट्टीतेल शरीरमा छर्किनु भयो र सलाईको काँटी बालेर मेरो शरीरमा फाल्नुभयो । त्यसपछि आगो शरीरमा दन्दनी वल्न थाल्यो, म गुहार भन्दै चिच्याउन थालें तर श्रीमान् ढोका वन्द गरेर वसे । यत्तिकैमा छिमेकी आएर आगो निभाए रे म त वेहोस भएँछु केही थाहा भएन ।’
विवाहपछि ससुरालीनजिक तोपगाछीको केर्खा वजारमा वस्दै आएका साजनले डेरा बसेको कोठामा नै श्रीमतीलाई छोरी जन्माएको झोंकमा जीउँदै आगो लगाएका थिए । आगोले ज्योतिको सवैभन्दा वढी घाँटी, पेट, छाती, हात खुट्टामा गम्भिर चोट लागेको छ ।
आगोले जली घाइते भएकी ज्योतीको उपाचरमा हालसम्म लगभग चार लाख रुपैयाँ खर्च भइसकेको छ । उक्त खर्च ज्योतिका वुवा मोहनले ऋण गरेर उपचार गरेको जानकरी दिए । ५ महिनाकी नातिनीसहित माइती घरमा नै शरण लिएर उपचार गरिहरेकी ज्योतिको डढेको शरीर आर्थिक अभावका कारण कारण उपचारमा समेत समस्या भएको वुवा मोहनले वताए । यसरी आफ्नो सग्लो शरीरमा आगो लगाएर गरिखान नसक्ने वनाएकोमा दोषीलाई कडा कार्वाही हुनु पर्ने पिडितको माग छ ।