राष्ट्रिय जनशक्ति पार्टीका नेता डा. प्रकाशचन्द्र लोहनीका अनुसार राजतन्त्र ढले पनि अहिले ठूला तीन दलले नयाँ राजतन्त्र जन्माएका छन्　। ठूला दलले साना दललाई मुसाबराबर नठानेको उनको भनाइ छ　। ठूला दलका गल्ती र कमजोरीबारे डा. लोहनीको विश्लेषणः

'सानो पार्टीको सबैभन्दा ठूलो दुःख भनेको सानो हुनु नै हो　। ठूला पार्टीले साना पार्टीलाई मुसाबराबर गन्दैनन्　। एमाओवादी, कांग्रेस र एमाले, तीन दलले जे गर्‍यो, त्यही नै अन्तिम सत्य हो भएको छ　। तीन दलको सहमति, तीन दलको सम्झौता, तीन दलको ह्यान र त्यान ! हो, तीन दल ठूला हुन्　। यसमा शंका छैन　। तर, सानो/ठूलो भन्ने कुरा सापेक्ष हो　। माओवादीको तुलनामा कांग्रेस सानो, कांग्रेसभन्दा एमाले सानो　।

ठूला दलले साना दललाई खाइरहेछन्, ठूलो माछाले सानो माछा खाएझैँ　। मत्स्य संसार भएको छ नेपाली राजनीति　। तीन दललाई चुनौती दिने चौथो शक्ति छैन　।

तीन दलको मानसिकता सामन्ती मानसिकता हो　। हामी हाँै सर्वेसर्वा, निर्णय हामीले गर्ने हो- यही हो उनीहरूको मानसिकता　। तीन दलको तानाशाही चलेको छ मुलुकमा　। तीनवटा नवराजतन्त्र चलिरहेको छ अहिले, तीन नवराजाका हुकुम !

published on nayapatrika.com

http://www.nayapatrika.com/newsportal/middle_page/20262.html