फूलबारी स्याहारेको, आफ्नो कथा लेखें कैले !

बनमारा उमारेको, आफ्नो कथा लेखें कैले !

बनाउने हिम्मत् गर्दै खोतलेर हेरें आफै

झनै बढि बिगारेको, आफ्नो कथा लेखें कैले !

आशिर्बाद लिने दिने साईतमा एक्लो परें

आफैलाई धिक्कारेको, आफ्नो कथा लेखें कैले !

खोटहरु यति धेरै छोप्दा छोप्दा म हैरान

खुबी मात्र उघारेको आफ्नो कथा लेखें कैले !

तिमीलाई प्रभाबमा पार्दै कैदी बन्ने रहर्

झ्यालखाना सिँगारेको आफ्नो कथा लेखेँ कैले !

ति ओठले मेरो नाम लेला भन्ने जाग्दो आशा

मैले माया नमारेको आफ्नो कथा लेखेँ कैले !

नबुझेको पनि हैन नचाहेको पनि हैन

तिम्रा ईच्छा नकारेको आफ्नो कथा लेखें कैले !