लहरे- लहरो तान्दा पहरो गर्जिन्छ भन्या जस्तो यो महिना लहरेको पन्ध्रवटा भाग्यलाई शनीले दुई भाग लगाईदिँदा दुई वटा साढेसातको दशाको योग छ। लहरेको पछि लाग्ने ग्रह दशाहरुको तँछाड-मछाडले लहरेको कछाड समेत फुस्काऊने दुर्लभ योग देखिन आएको छ। 'ल' दशाको कारणले लहरेको लर्के जोबनमा यो महिना कुनै घाम नलाग्ने संकेत देखिएको छ। लभ गर्न खोज्दा लोप्पा खाने तथा लेट हुन पुग्दा जागिर नै चेट हुन जाने हुँदा लहरेलाई लाभको कुनै लोभ नराखे हुन्छ भनेर लहरेको हस्तरेखा भन्दछ। बिशेष गरि 'ल' र लडकिहरुसंग लहरे सतर्क हुन पर्ने देखिन्छ। लज्जावती सम्झेर लभ गर्न जाँदा लडकि ललिला पावर बन्न पुग्ने,लारा दत्ता जस्तो लाग्ने लडकि लेडिक्रफ्ट बन्न पुगि लात खाने तथा यहाँसम्म कि शौचगर्न जाँदा पटक पटक झुक्किन पुगि 'लेडिज'लेखिएको भित्र छिर्दा लहरेले खुद्रामा हैन थोकमा लतक खाने संभावना छ। प्रणयतर्फ भने लहरेको यो महिना 'ल्याईते' योग रहेको छ तर पनि मंगल टाढा परेकोले 'ल्याईते' हुनको लागि पहिला 'ब्याइते' हुन पर्ने र यो महिना 'ब्याईते'को योग नपरेकोले ल्याईतेको राम्रो योग समेत लहरेलाई काइते हुन पुगेकोले मनमनै मायामा घाईते हुने योग छ।

(नोट:जाबो एक रुपियाँ भेटिले यो भन्दा बढि राशी नभनिने जानकारि गराउँदछु।)