कहि कतै छिसिक्क केही भयो भने विज्ञप्ती जारी गरेर हल्ला गर्ने बालबालीकाको क्षेत्रमा काम गर्ने संस्थाहरु किशोरीको बलात्कारको केसमा  मौन छन । किशोरी बलात्कारको अभियोग लागेका रामआशिस महतो फरार छन । तर उनलाई पक्राउ गरी कानुनको कठघरामा उभ्याउने चासो कसैले देखाएका छैनन । सरकारी वकिलले बदमासी गर्दै केस कमजोर बनाएर अपराधको मुख्य अभियुक्तलाइ जोगाउन ज्यान फालेर लागेका छन । कसैको घरमा काम गरिरहेकी बालीकालाइ थप्पड हानेको समाचार सार्वजनिक हुंनासाथ कोकोहोलो गरेर बाल अधिकार र बाल शोषणको बारेमा चर्का भाषण गर्ने एनजिओहरु भने यो विषयमा कानमा तेल हालेर बसेका छन ।

यो बारेमा महिला अधिकारको ठेक्का लिएर बसेका महिलाअधिकारवादीहरु पनि मौन छन । सामान्य विषयमा संविधान सभाको रोष्टम घेरेर हैरान बनाउने सभासदहरु मौन छन । अनी श्रीमतिको इच्छा विपरित यौन सम्पर्क राख्ने श्रीमान समेत बलात्कारी हो भनेर कुर्लने कानुन व्यवसायिहरु मौन छन । कारण के होला ?

कारण स्पष्ट छ । बलात्कारको अभियोग लागेका ब्यक्ति सानातीना हैनन । पावरफुल परिवारका हुन । जसको विरुद्धमा बोल्दा उनीहरुको दानापानी हराउन सक्छ । ति ब्यक्तिको परिवारको अन्तराष्ट्रिय क्षेत्रमा राम्रो प्रभाव छ । अनी ति परिवारका सदस्यलाई मनाउन सक्यो भने सामाजीक काम गर्ने बहानामा राम्रै धनरासी पाउन सकिन्छ भने जावो बलात्कारको विषयमा के कुरा उठाउनु भन्ने उनीहरुको मानसिकताले उनीहरु मौन बसेका हुन भन्दा सायद फरक नपर्ला ।

अपहरण गरेर हत्या गरी मृत शरिरलाई टुक्रा टुक्रा बनाएर फाल्ने ख्याति श्रेष्ठका हत्यारा अहिले प्रहरी हिरासतमा छन । उनलाई कडा कार्वाही गर्नुपर्ने माग गर्दै दैनिक प्रर्दशन भइरहेका छन । उनको हत्याको विरोध गर्दै विज्ञप्ती निकाल्नेहरुको संख्या दैनिकरुपमा बाक्लीदै गएको छ । यसले ख्यातिको हत्यारालाइ हदैसम्मको कारवाही गर्न सम्बन्धीत निकायलाइ राम्रै दवाव परेको छ । यसले पैसाको बलमा कानुनको कमजोरी खोजेर हत्याको अभियोग लागेका विरेन श्रेष्ठलाइ जोगाउने हिम्मत कसैले गर्ने छैनन । क्रुर अपराधको विरुद्धमा नागरिक समाज जागरुक हुनु अत्यन्त सकारात्मक हो ।

तर ख्यातिको हत्यामा जागरुक भएको यो समाज एक किशोरीको बलात्कारको विषयमा किन मौन छ ? ति बलात्कारको सिकार भएको किशोरीको पक्षमा किन यो समाज बोल्दैन ? पिडितको अवस्था हेरेर किन यो समाज भेदभाव गर्छ ? रामआसिस महतोलाइ पक्राउ गरी कडा भन्दा कडा कार्वाही होस भनेर किन कोही आवाज उठाउंदैन ? बढो अचम्म छ यो समाज । खाली बलेको आगो मात्र ताप्ने । कुन विषयमा केही गर्दा के आफ्नो कुनचै स्वार्थ पुरा हुन्छ भनेर सोचेर मात्र कदम चाल्ने ।

अव विरेनको स्थानमा ति रामआसिशलाइ राखेर हेरौं न । के यो समाज त्यत्तिकै जागरुक हुन्थ्यो होला ? यत्तिकै दवाव हुन्थ्यो होला ? अनी यसरी नै विरोध प्रर्दशन भइरहनथ्यो होला र ? मलाइ लाग्छ अंह हुन्नथ्यो ।

सायद शक्तिसम्पन्न परिवारका सदस्य नभइ कुनै सामान्य परिवारका सदस्यले रामआसिशको झै कुकर्म गरेको भए उनको विरोध सबै खनिने थिए । सबैले धिकार्ने थिए । अनी ति अभियुक्तलाइ कडा कार्वाहीको माग गर्नेहरुको तांती लामै हुन्थ्यो होला । ति किशोरीको दुर्भाग्य भनेको उनी शक्तिसम्पन्न ब्यक्तिको हातवाट बलात्कृत हुनुनै रहेछ । उनी त्यस्ता ब्यक्तिको सिकार बनिन जसको छोरा अन्तराष्ट्रिय व्यापारी हुन । जसको ज्वाई र छोरी यो मुलुकको शक्तिसम्पन्न संविधान सभाका सदस्य छन । उनीको साथमा यो देशका ठालुहरु हुन भन्ने सबै छन । अनी कसरी ति किशोरीको पक्षमा कसैले आवाज उठाउंछ र ?