इन्द्रजात्राय् सरकारपाखें बीमाःगु खर्च क्वपाःगु खँयात कयाः हजारौं हजार नेवाः जनता सतकय् कुहां वयाः प्यन्हु तक लगातार तःधंगु विरोध यात । दर्जनौं मयाक्क झी पासापिं घाःपाः नं जुल । स्वनिगःया नेवाः क्षेत्र दक्वथाय् २०४६ सालया आन्दोलनया इलय् थें हे रुप काल । देशय् न्ह्याम्ह हे सरकार वःसा नेवाःतय्त हेला याना हल धकाः ६५-७० दँयापिं निसें कयाः १०-१२ दँयापिं मस्त नेवाःत तकं आन्दोलनय् सरिक जुयाः सरकारयात सार्वजनिक रुपं क्षमा फ्वंका: हे त्वःतल । नेवाःत संगठित यायेत धकाः स्वनातःगु नेपालभाषा मंकाः खलः नेवाः देय् दबू नेवाः राष्ट्रिय मुक्ति मोर्चा आदि संस्थातय्सं छुं कथं हे ग्वाहालि मयाःसां स्वतः स्फुर्तिसाथं नेवाःत सतकय् कुहां वयाः आन्दोलनयात निरन्तरता बियाच्वन । जिं सीक नेवाःत जानाः दकलय् तःधंगु आन्दोलन याःगु थ्वहे न्हापांखुसी जुइमाः थें ताया ।
तर बिडम्बनाया खँ छु धाःसां उलिमछि नेवाः जनता सतकय् वयाः आन्दोलन यानाच्वनं नं नेवाः नेता धकाः नांदंपिं पद्मरत्न तुलाधर मल्ल के सुन्दर केशव स्थापित आदि नेतातय्गु छगू हे शब्द न्यने मखंगु तधंगु दुर्भाग्यया खँ खः । वयक:पिं नेवाः जनतापाखें हे सम्मानित व्यक्ति खः । वयक:पिं थ्व आन्दोलनया ख्यलय् छाय् खने मंत छाय् छगू हे शब्द न्ववाना मदियागु खः । थ्व न्ह्यसःया लिसः बियादी धकाः भलसा कयाच्वना ।
- लक्ष्मण स्थापित
आन्दोलन न्ह्यलुवा:
http://www.nepalnews.com/contents/2008/newaridaily/sandhyatimes/sep/sep24/letter.php#1