यहाँ भन्दा धेरै पर, मेरो एउटा घर छ

त्यहाँ मेरै चिन्ता, फिक्री मेरैलागि डर छ!!

जहाँ, मेरा बाबा आजपनि,

अनायसै मलाई बोलाउनुहुन्छ रे

मलाई नै संझी आमा

घन्टौं घन्टा टोलाउनुहुन्छ रे

मेरो भाइ प्रत्येक पल

मलाई नै संझन्छ रे

बोलाएँ कि मैले भनी

निद्राबाट ब्युँझन्छ रे!

यहाँ भन्दा धेरै पर, मेरो एउटा घर छ

त्यहाँ मेरै चिन्ता, फिक्री मेरैलागि डर छ!!

जहाँ, हरेक पारिवारिक जमघटहरुमा

कति आँशु पोखिन्छन् रे

हिंड्दा हिड्दै म जस्तै कोही देख्दा

कति पाइला रोकिन्छन् रे

म नभए नि जताततै

मेरै छायाँ छ रे त्यहाँ

माया, माया मात्र माया

मेरैलागि छ रे त्यहाँ

मैले केही नगरे नि जसलाई मेरो भर छ

यहाँ भन्दा धेरै पर मेरो एउटा घर छ!!!