२ चैत्र २०६४ | १५:२९ मा पोष्ट गरिएको
चिनियाँ सरकारको दबाबमा नेपाल सरकारले बैशाख १९ देखि २९ सम्म दक्षिणतर्फबाट सगरमाथा आरोहण अनुमति नदिने निर्णय गरेको छ । सरकारले यो निर्णय गरेको पुष्टि गर्दै पर्यटन तथा नागरिक उड्डयन मन्त्री पृथ्वीसुब्बा गुरुङले चैत १ गते भने, 'बैशाख १९ देखि २९ गतेसम्म सगरमाथा आरोहण अनुमति दिइने छैन ।'

त्यसबेलाका लागि उत्तरतर्फबाट सगरमाथा आरोहण अनुमति रोकिसकेको चिन सरकारका कुटनीतिक अधिकारीहरुले नेपाललाई पनि आरोहण अनुमति नदिन यो हप्ता निकै दबाब दिएका थिए ।

ओलम्पिक र्टच सगरमाथा पुर्‍याउने चिनियाँ सरकारको योजनामा स्वतन्त्र तिब्बतपक्षधर तिब्बती शरणार्थीले अवरोध पुर्‍याउने आशंकामा चिन सरकारले आफ्नोतर्फबाट आरोहण अनुमति नदिएको हो भने नेपाललाई पनि आरोहण अनुमति नदिन दबाब दिएको हो ।

स्वतन्त्र तिब्बत अभियान संचालन गरिरहेका तिब्बती शरणार्थीहरुलाई चैत १ गते तिब्बतमा चिनियाँ प्रहरीले तथा राजधानीको बौद्धमा नेपाल प्रहरीले दमन गरेको बिरोधमा चैत २ गते संयुक्त राष्ट्र संघको कार्यलय पुल्चोकमा तिब्बती शरणार्थीहरुले बिरोध प्रदर्शन गरे । प्रदर्शनमा प्रहरीले हस्तक्षेप गरेको छ ।

सूचना: यो समाचार/ लेख/ अन्तर्वार्ता प्रशारण वा प्रकाशन गर्दा हिमालखबर डट कमलाई उदृत गर्न अनुरोध छ ।