म र गोठालाहरु

म मौन छु र मौनता रुचाइरहेछु

आगोको सामिप्य र न्यानोपनमा

मैले दिनचर्याहरु भूलिरहेछु

र कानेखुशी गर्दैछन् गोठालाहरु

म र गोठालाहरुबीचको भेद

केवल मलाई र आगोलाई थाह छ

मेरो चेतना मेरो विद्रोहलाई दबाइरहेछ

त्यसैले सुस्केरा हाल्दैछन गोठालाहरु

आगो मेरो आँगनमा बलिरहेछ

र जीवन पर्यन्त बल्ने चिराग छ

त्यसैले जरुरी छैन सम्झाउन

कठ्याङ्ग्रिएका इर्ष्यालु गोठालाहरुलाई

मलाई न्यानोपन दिने प्रण छ मेरो आगोमा

अरुलाई लल्कार्ने र पोल्ने ज्वाला छ मेरो आगोमा

गोठालाहरु झ्याली पिटेर ख्याल तातो मान्दैछन

अनि म मुस्कुराउँदैछु तिनका मृगतृष्णाहरु देखेर

होहल्ला गरुन नथाक्दासम्म उँभोदेशे गोठालाहरु

भेंडा हसाउँन नौटंकी गरुन दिग्भ्र‍मित गोठालाहरु