[Show all top banners]

nozzs
Replies to this thread:

More by nozzs
What people are reading
Subscribers
:: Subscribe
Back to: Kurakani General Refresh page to view new replies
 खान पुगोस्, दिन पुगोस्
[VIEWED 5600 TIMES]
SAVE! for ease of future access.
Posted on 07-31-16 3:36 AM     Reply [Subscribe]
Login in to Rate this Post:     0       ?    
 

मेरो नाममा भएको जग्गा राष्ट्रिय आविष्कार केन्द्र लाई दान गर्ने घोषणा: महाबीर पुन !
यो घोषणा नयाँ होइन. यो घोषणा अर्थमन्त्री डा. रामशरण महतज्यू र बिष्णु पौडेलज्यू सहित उहाँहरुको अर्थ सचिबहरु, सह सचिब हरु अनी दुई प्रधान मन्त्रीहरु र उहाँहरुका सल्लाहकार हरुलाई बिगतका दिनहरुमा बारम्बार भनि सकेको कुरा हो. मैले उहाँहरु सबै लाई यदि "सरकारले राष्ट्रिय अविष्कार केन्द्र लाइ सहयोग गर्न मिल्दैन अथवा सहयोग गर्न सक्दैन भने मेरो नाममा भएको करिब रु. ३ करोड पर्ने २८ रोपनी जग्गा बेचेरै भए पनि सुरु गर्छु" भनेर भने कै हो. यसो भन्दा उहाँहरुले "जग्गा बेच्नु पर्दैन बरु त्यहाँ पनि सानो अनुसन्धान केन्द्र बनाउन सकिन्छ" भनेको हो. त्यो २८ रोपनी जग्गाको बारेमा थोरै कुरा प्रष्ट पार्न चाहन्छु. त्यो जग्गा पोखराको बेगनास तालको उत्तर पट्टीको ठुलाकोट भन्ने डाँडामा छ. त्यो जग्गा हाल Maryland USA मा बस्ने बन्बरे, पर्बतको पदम पुन भाई र मैले २० बर्ष अगाडी किनेको हो. त्यो जग्गा किन्दा हामीले त्यसलाई भविष्यमा समुदायहरु लाई फाइदा हुने कुनै राम्रो कामको लागी प्रयोग गर्ने भनेर सल्लाह गरेका थियौं. त्यति बेला त्यो जग्गा पदम भाईको नाममा किनेको थियौं. तर पदम भाई अमेरिकामा बसोबास गरेकोले केहि महिना अगाढी सो जग्गा मेरो नाममा नाम सारी गरिएको छ. सो एरियाको हालको जग्गा लेनदेनको आधारमा त्यसको मोटामोटी मूल्य रु. ३ करोड पर्छ. सो जग्गाको लालपुर्जी यहाँ संलग्न गरेको छु. मेरो नाममा यो भन्दा अर्को कुनै भौतिक सम्पत्ति छैन. अब हामी राष्ट्रिय आविष्कार केन्द्र स्थापना गर्न सरकारको ढोका छोडेर जनताको ढोकामा गै सकेको अवस्थामा र मैले नेपालको बिकासको लागी अब मेरो बचेको जिन्दगीको सम्पूर्ण समय दान गर्छू भनि रहेको अबस्थामा सो २८ रोपनी जग्गा पनि राष्ट्रिय आविष्कार केन्द्र लाई दान गर्ने कुरा घोषणा गर्दछु. पैसाको अति नै आबश्यकता भएको खण्डमा त्यो जग्गा बेच्ने अथवा पैसा पुगेको खण्डमा त्यो जग्गामा अनुसन्धानको लागी चाहिने केहि भौतिक संरचनाहरु बनाइनेछ. तपाईंहरु संग पनि त्यस्तो दान गर्न मिल्ने कुनै जग्गा छ भने दान गर्न सक्नु हुनेछ. जग्गा दान पनि अहिले सुरु गरिएको महादान अभियान कै अंग हुनेछ. तपाईहरुले पनि विचार गर्नु होस् र http://www.nicnepal.org मा गएर हेर्नु होस् . कुरा नबुझेमा सम्पर्क गर्नु होस्. Mobile नम्बर 9841592361.

(श्रोतःमहाबिर पुनको फेसबुक पेजबाट)

 
Posted on 08-20-16 8:03 PM     [Snapshot: 284]     Reply [Subscribe]
Login in to Rate this Post:     0       ?    
 

खरदारको सम्पत्ति ५० करोड:

जनकपुर एयरपोर्ट छाड्नेबित्तिकै हामी चढेको जीपले उधुम मच्चायो। गाडी यति पुरानो रहेछ, कुनै पार्टपूर्जा सद्दे नाइँ। झ्याल–ढोकाका नटबोल्ट एकोहोरो चुइँकिन थाले। सिटहरू भुइँचालो जाँदा दराजटेबुल थर्केजस्तो डङडङ गर्दै कराउन थाले। 
 जीपमा दस मिनेट लगाएर जनकपुरको केन्द्रविन्दु विद्यापति चोकसम्म पुग्दा सडक एक मिटर पनि पक्की थिएन। जबकि यो कालोपत्रे सडक हो। सडकका दुवैतिर फोहोर थुप्रिएका थिए। यस्तो लाग्थ्यो, नगरपालिकाका सरसफाइ कर्मचारी महिनौंदेखि बिदामा छन्। सहरलाई एयरपोर्ट जोड्ने यो मूलसडक मात्र होइन, रामजानकी मन्दिर र मुख्य बजारक्षेत्रका केही किलोमिटरबाहेक जम्मै सडकको हाल यस्तै। मूलसडकबाट दायाँबायाँ छिर्ने हो भने त सडक शौचालयमा बदलिएछ कि भन्ने भान पथ्र्यो। 
 कुनै पनि सहरको समृद्धि र त्यहाँको प्रशासनिक व्यवस्था मूल्यांकन गर्नुछ भने सडक हेरे हुन्छ। धुलाम्मे र कच्ची सडकले सहरको गरिबी झल्काउँछ। कच्चीमा परिणत हुँदै गएका एकताकाका पक्की सडकले त्यहाँ व्याप्त भ्रष्टाचार र अव्यवस्था देखाउँछ। सडकलाई सहरको ऐना भनिएको त्यही भएर हो। 
 थोत्रो जीप र जीर्ण सडकमा ऐतिहासिक धार्मिक नगरी जनकपुरको ऐना हेर्दै हामी होटल पुग्यौं। रिसेप्सनमा राखिएका राष्ट्रिय अखबारहरू यसो पल्टाएको, त्यस दिनका अधिकांश अखबारमा धनुषाको सडक निर्माणमा व्याप्त भ्रष्टाचारको खबर नै छापिएको थियो।
 राष्ट्रपति रामवरण यादवको गाउँ जाने सडक निर्माणमा भ्रष्टाचार गरेको भन्दै अख्तियार दुरुपयोग अनुसन्धान आयोगले प्रमुख जिल्ला इन्जिनियरसहित जिविसका १६ कर्मचारीविरुद्ध मुद्दा दर्ता गरेको रहेछ। मुद्दा लागेकामध्ये जिविसका सह–लेखापाल जीवनाथ चौधरी एक हुन्। 
 चौधरीले जिन्दगीमा ठूलै अभाव देखे। गरिबीबाट मुक्ति पाउन उनका बाबु मेनेजर चौधरी महोत्तरीको एउटा गाउँबाट जनकपुर छिरेका थिए, २०४२ सालमा। अस्पताल रोडमा एउटा सानो पसल थापेर गुजारा चलाउन थाले। दस वर्ष यसैगरी बित्यो। २०५२ सालतिर जीवछ कांग्रेसका स्थानीय नेता रामसरोज यादवको सम्पर्कमा आए। उनी यादवकै भनसुन लगाएर जिविसको खरदारमा नियुक्त भए।
 पहिलोचोटि साइकल चढेर जिविस छिरेका चौधरीले पछिल्ला १७ वर्षमा चमत्कार गरेका छन्। उनले प्रेस खोलेर जिविसका सम्पूर्ण सामग्री छपाए। ठेकेदारसँग मिलेर निर्माण कार्यमा भ्रष्टाचार गरे। मठाधीशहरूसँग मिलेर मठ मन्दिरको जग्गा कब्जा गरे। राजनीतिज्ञहरूको आशिर्वाद र संरक्षण पाएर क्लब खोले। गुन्डा पाले। बन्दुक पड्काए। धनी गुन्डा बने। 
 अहिले चौधरीसँग कति सम्पत्ति छ भन्ने लेखाजोखा गर्न गाह्रो छ। सहरमा हालसालै बनेको आधुनिक होटल सीता प्यालेस, बजारको तीनतले घर, भन्सार नतिरेका चारवटा गाडी, सहरका महंगा ठाउँहरूमा आकर्षक घडेरीका मालिक हुन् उनी। उनीसँग एक अर्ब रुपैयाँभन्दा बढीको सम्पत्ति छ भनेर अड्कल काट्नेहरू जनकपुरमा थुप्रै छन्। जसलाई नमान्नेहरू पनि ५० करोडभन्दा कम छैन भन्नेमा सहमत हुन्छन्।
 जनकपुरको बसाइपछि एयरपोर्ट फर्कंदा मैले रिक्साचालक झल्लु दासलाई चौधरीको बारेमा सोधेको थिएँ। उनको जवाफ थियो, ‘के भन्ने हजुर, जिविसबाट खुब ढौवा कमायो। त्यो उसको होटल छ न सीता पैलेस, मठको जग्गा हडपेर बनाएको हो। ठूलो डन छ यहाँको।’ उनले अगाडि भने, ‘त्यो सांसद छ न तक्ला... अँ सञ्जय साह, दुईजना पहिले खुब मिल्थे, तक्लाले ठेक्का लिने, अनि जीवछसँग मिलेर पैसा खाने। अहिले त उनीहरूको दुस्मनी भैगो पैसालाई लिएर।’ 
 चौधरीको ‘अस्वाभाविक’ प्रगतिको कथाबारे रिक्साचालक झल्लुसमेत बेखबर छैनन् भने सांसद, प्रहरी र प्रशासनलाई थाहा नहुने कुरै भएन। यति हुँदाहुँदै चौधरीलाई किन कसैले रोकेन ? किन कारबाही भएन ? यो प्रश्नको उत्तर जनकपुर वा धनुषाको स्थानीय पृष्ठभूमिमा मात्र खोज्न सकिन्न। यसलाई राष्ट्रिय सन्दर्भमै हेरिनुपर्छ। 

२०६७ भदौ १९ गते संसद अधिधेशन चलिरहेको थियो। माओवादी नेता कृष्णबहादुर महराको सनसनीपूर्ण अडियो टेप सार्वजनिक भयो। टेपमा महराले कथित चिनियाँ व्यापारीसँग ५० करोड मागेको स्पष्टै सुनिन्थ्यो, माओवादी अध्यक्ष पुष्पकमल दहाललाई प्रधानमन्त्रीमा जिताउन ५० जना सांसद किन्ने उद्देश्यले। टेपमा सुनिएको कुरा अत्यन्त गम्भीर थियो। त्यो भ्रष्टाचार मात्र थिएन। महराले टेपको तुरुन्त खण्डन गरे। तर, प्रयोगशालामा स्वर जचाएर आफू निर्दोष भएको प्रमाणित गर्नबाट पन्छिए। 
 त्यस्तो गम्भीर घटनाको संसदमा खासै विरोध भएन। कांग्रेस र एमालेका केही नेताले झारा टार्ने हिसाबले विरोध गरे पनि गम्भीर रूपमा कुरा उठाएनन्। किन ? ‘सबैले पैसा लिएका छन् कतै न कतैबाट,’ कांग्रेसका एक नेताले मलाई अथ्र्याए, ‘गएको चुनावमा भारतीय राजदूतले हाम्रा सभापतिलाई ‘के सहयोग गरौं गिरिजाबाबु’ भनेर सोधेका थिए। उहाँले ‘चुनावमा पैसा चाहिन्छ, १० करोड देऊ’ भन्नुभयो। सात करोड तुरुन्तै आयो, तीन करोड पछि।’ 
 विकासमाथि राजनीतिले संगठित रूपमा हमला गर्न थालेको अर्को प्रसंग पनि छ। २०६७ चैततिरको कुरा हो। गोरखा जिल्लामा एनेकपा माओवादीको भ्रातृ संगठन वाइसिएलले २० करोड रुपैयाँ लागतको स्थानीय सडक निर्माण ठेक्कामा धावा बोलेको थियो। वाइसिएल गोरखा जिल्ला सचिव चुडामणि खड्काको नेतृत्वमा उनीहरूले आफूसँग साँठगाँठ भएको एकजना ठेकेदारलाई मात्र टेन्डर भर्न दिए। अरूलाई टेन्डर स्थलबाटै धपाए। मैले घटनाको विरोध गर्दै माओवादी उपाध्यक्ष बाबुराम भट्टराईका नाममा रिपब्लिका दैनिकमा सार्वजनिक पत्र लेखेँ। भेटमा भट्टराईले मसँग भने, ‘हाम्रो राजनीति नै फोहोर छ, नेतृत्वमा नपुगी यस्तो कुरा सुधार्न सकिन्न।’ त्यसताका उनी प्रधानमन्त्रीका तीव्र आकांक्षी थिए। हिसिला यमीले मलाई एसएमएस पठाइन्, ‘हामीलाई सचेत गराउनुभएकोमा धन्यवाद ! उनै बाबुराम र हिसिलाले बालुवाटार छिरेपछि के गरे, के गरेनन् जगजाहेर छ।

 जनकपुरका जीवछ राजनीति र कर्मचारीतन्त्रमा व्याप्त भ्रष्टाचारको सानो उदाहरण मात्र हुन्। मूल समस्या हो, सत्ताको आडमा गरिने भ्रष्टाचार। नेपाली समाजको अविकास र अव्यवस्थाको मूल जड पनि यही हो। राणा शासन, पञ्चायत, कांग्रेस, एमाले र पछिल्लोचोटि माओवादी तथा मधेसी मोर्चाले सत्ताको आडमा कति भ्रष्टाचार गरे होलान् ? सत्तासीन व्यक्ति, तिनका आफन्त, उनीहरूसँग जोडिएका कर्मचारी, व्यापारीले कति भ्रष्टाचार गरे होलान् ? त्यो भ्रष्टाचारका कारण हाम्रा सडक, स्वास्थ्य चौकी, स्कुल र हाम्रो समाज कति बिग्रियो होला ? हाम्रो विकास कति पछाडि धकेलियो होला ? अनि त्यसले झल्लु दासजस्ता तल्लो तप्काका नागरिकलाई कति पीडा पुगिरहेको होला ? 
 ६१ वर्षे झल्लु दास ३१ वर्षदेखि जनकपुरका सडकमा रिक्सा चलाउँदै छन्। उनले पढेलेखेका छैनन्। छोरालाई पनि धेरै पढाउन सकेनन्। किताबकापी किनिदिन पैसा पुगेन। उनका छोराले पाँच कक्षामै स्कुल छाडे। ‘छोरालाई रिक्साचालक बनाउन मन लागेन, बहुत दुःख हुन्छ, त्यसैले साउदी अरब पठाएँ,’ कच्ची सडकमा बेस्सरी रिक्साको प्याडल मारिरहेका झल्लुले सास फुलाउँदै भने। जनकपुरका सडक मात्र पक्की हुन्थे भने झल्लुको जीवन अलि सहज हुन्थ्यो।
 (अमित ढकाल )
Last edited: 20-Aug-16 08:06 PM

 
Posted on 08-20-16 9:16 PM     [Snapshot: 332]     Reply [Subscribe]
Login in to Rate this Post:     0       ?    
 

साह्रै मार्मिक कथा

 
Posted on 08-21-16 3:47 AM     [Snapshot: 424]     Reply [Subscribe]
Login in to Rate this Post:     0       ?    
 

१० लाख खर्च देखाएर खोरजत्रो घर ! गोरखा: भूकम्पपछि राहत, उद्धार, पुनर्लाभ र पुनस्र्थापनाका लागि सहयोग गर्न गोरखा आएको क्याथोलिक रिलिफ सर्भिस (सीआरएस) ले खोरजत्रो घर बनाएर बजेट सिध्याउने गरेको छ । भूकम्पपीडितको नाममा क्रिस्चियन च्यारिटीबाट जुटाएको रकममध्ये एक करोड रुपैयाँभन्दा धेरै बजेट खोरजत्रा घर बनाएर सिध्याएको हो ।
(अन्नपुण॔ पोष्ट )

 
Posted on 08-23-16 3:37 AM     [Snapshot: 604]     Reply [Subscribe]
Login in to Rate this Post:     0       ?    
 

प्रधानमन्त्रीज्यू, 
तपाईं र सरकारले योग्य ठाने मलाई सहयोग गरे हुन्छ ! 
 सम्माननीय प्रधानमन्त्रीज्यू, नमस्कार ! 
 म एमबिबिएस दोस्रो वर्ष पढिरहेको एक जेहेन्दार विद्यार्थी हुँ। मेरो बुबा सर्वहाराको ‘मुक्ति र उत्थानका लागि’ भनेर तपाईंको नेतृत्वमा सुरु भएको ‘जनयुद्ध’ क्रममा राज्यद्वारा बेपत्ता पारिनुभएको थियो। तपाईंलाई ‘भगवानरुपी कमरेड’ मान्नुहुन्थ्यो। ‘जनयुद्ध’ ले प्रत्यक्ष वा अप्रत्यक्ष रूपमा पीडित पारिएकाको तर्फबाट म प्रतिनिधि पात्रका रूपमा यहाँ आफ्नो कुरा राख्दैछु। 
 ‘जनयुद्ध’ का सम्पूर्ण घटना प्रत्यक्ष रूपमा तपाईंसँग जोडिएकाले तपईं संवेदनशील र जिम्मेवार हुनुहुनेछ भन्ने अपेक्षा छ। शुरु मेरा बुबालाई बेपत्ता पारिएको घटनाबाट गर्न चाहन्छु । 
 मितिः २०५८ माघ १५ गते स्थानः हंसपुर–४, भच्चेक, गोरखा गाउँमा बिहानैदेखि मुसलधारे पानी परिरहेको थियो। सधैंजसो दुखेर सताइरहने दाँत उपचार गर्न आमालाई लिएर बुबा भच्चेक हेल्थपोस्ट जानुभएको थियो। त्यहाँ पुग्नेबित्तिकै करिब एक किलोमिटर पर रहेको ब्यारेकबाट तीन जनाको समूह आइपुग्यो। 
 ‘माधव अधिकारी भनेको तैं होस्?’ समूहको एउटा बोल्यो। ‘हो, मै हो हजुर,’ आर्मीका मान्छे हुन् भन्ने भेउ पाइसक्नुभएका बुबाले विनम्रतापूर्वक भन्नुभयो, ‘किन खोज्नुभएको होला?’ 
 ‘तँ हामीसँग जानुपर्ने भयो,’ समूहको अलि मोटो व्यक्ति कड्कियो, ‘हिँड्।’ 
 ‘जहान दाँत दुखेर छटपटाइरहेकी छे, एकैछिन तपाईंहरू यहीँ बस्दै गर्नोस्, अनि म जानेछु,’ बुबाले दुई हात जोडेर भन्नुभयो।
 ‘ए, तेरो बूढीको उपचार गर्न हामी यहाँ बस्नुपर्ने, हिँड खुरुक्क, पैला तेरै दाँत ठिक पार्नुपर्नेछ,’ अघिकै मोटो मानिसले हप्काउँदै भन्यो।
 उनीहरूले बुबालाई घिसार्दै लगे। दाँतको उपचार गर्न आउनुभएकी मेरी आमा त्यहीँ बेहोस हुनुभएछ। घर फर्केपछि आँखाबाट अविरल अाँसुका धारा बगाउँदै आमाले भन्नुभयो, ‘म त बेहोस भएछु बाबु। तेरा बुबालाई घिसार्दै थिए, बुबा आँखाभरि आँसु पारेर मलाई हेर्दै आर्मीलाई कराइरहनुभएको थियो...’ बोल्दाबोल्दै आमाका गला अवरुद्ध भए। मेरै काखमा घोप्टो परेर रुन थाल्नुभयो। मैले पनि आफूलाई थाम्न सकिनँ। झन् डाँको छाडेर रुन थालेँ। 
 म त्यतिबेला जम्मा ६ वर्षको थिएँ, तर यो घटना मेरो मस्तिष्कमा यस्तरी बसेको छ आजसम्म प्रस्ट याद छ। त्यो रात बुबाको पर्खाइमै बित्यो। आर्मीहरूले आमालाई ‘भरे पठाइदिन्छु’ भनेका थिए। साँच्चै पठाउलान् भन्ने आशमा बाटोभरि आँखा बिछ्याएर आमाले रात छर्लंगै पार्नुभयो। तर, न बुबा फर्किनुभयो न त उहाँलाई लैजाने आर्मीका मान्छे आए। 
भोलिपल्ट हामी सपरिवार ब्यारेक गयौं। ‘सर, मेरो बुबालाई हिजै घर पठाइदिने भन्नुभाको थियो, खोइ त?’ दाइले भन्नुभयो, ‘यो खाना खुवाएर हाम्रो बुबालाई लान्छौं।’ ‘ए, यति सजिलै भेट्न पाउने भए तेरो बाउलाई यहाँ किन राख्नुपर्थ्यो? खाना ले, म लगिदिन्छु,’ एक जना आर्मीले आमाको हातको सामान खोसेर लग्यो। आमा फेरि रुन थाल्नुभयो। एकैछिनमा बेहोस हुनुभयो। दाइ, दिदी र म मिलेर उहाँलाई स्वास्थ्यचौकी पुर्यायौं। ‘शरीरमा तागत छैन,’ भिटामिनको बट्टा दिँदै स्वास्थ्यकर्मीले भने।
 त्यस दिन हामीले लगेको खाना बुबासम्म पुग्यो कि पुगेन थाहा छैन। हामी भोलिपल्ट पनि गयौं। पर्सिपल्ट गयौं। दिनहुँ जान्थ्यौं। दिनहुँ खाना लिएर आर्मीलाई दिन्थ्यौं र ‘छाडिदेऊ हाम्रो बुबालाई, एकपल्ट मात्र भए पनि भेट्न देऊ’ भन्दै रुँदै बिन्ती गर्थ्यौं। 
 हाम्रो रोदन सुन्नु त कता हो कता, उल्टै एकदिन आमालाई भन्यो, ‘तिम्रो बूढोलाई सदरमुकाम लगेको छ, अब उतै जानू।’ उसका यी कुरा सुन्नेबित्तिकै हामी सबै आमालाई समातेर रुन थाल्यौं। हामी रोएको देखेर आमा मुर्छा पर्नुभयो। ‘आमा, म सदरमुकाम जान्छु र बुबालाई जसरी भए पनि लिएर आउँछु,’ दाइले भन्नुभयो। आमा केही बोल्नुभएन। 
एकैछिनपछि आमा नजिका आफन्तले साथ दिन्छन् कि भनेर जानुभयो। दाइसँग सदरमुकाम जान कोही तयार भएनन्। अन्तमा आमा र दाइ बुबालाई लिन भनी सदरमुकाम जानुभयो। घरबाट निस्केको आठौं दिनमा उहाँहरु फर्किनुभयो।
 ‘खोइ त बुबा? के भने आर्मीहरूले? कहिले आउनुहुन्छ हाम्रो बुबा?’ दिदीभन्दा दुई वर्ष मात्र जेठा दाइसँग यी प्रश्नका जवाफ थिएनन्। उहाँ केही बोल्नुभएन। मैले आमातिर पुलुक्क हेरेँ। उहाँका आँखा पूरै सुन्निएका थिए। सुन्निएका आँखाबाट आँसु थामिएकै थिएनन्।
 प्रधानमन्त्रीज्यू, बुबालाई बेपत्ता बनाएपछिका भरे त कति आए, कति गए। विडम्बना, बुबा आउने ‘भरे’ चाहिँ कहिल्यै आएन। अँध्यारा रातमा बुबा आएर ‘सावित्रा’ भन्दै बोलाउनुहुन्छ कि भनेर आमाले कयौं वर्ष पिँढीमै अनिँदो बिताउनुभयो। 
अहिले पनि ‘आमा भित्र जाउँ’ भन्ने बित्तिकै उहाँ गहभरि आँसु खसाल्नुहुन्छ। अब भन्नुस् त प्रधानमन्त्रीज्यू, म मेरी आमालाई कसरी सम्झाउँ? सम्झनामा बुबा बुबासँगका मेरा स्मृति यति कम छन्, म उहाँको आकृति कसैगरी पनि समाउन सक्दिन। 
 बुबाले कहिलेकाहीँ मेरो त्यो कलिलो गालामा आफ्नो गाला मुसारेर काउकुती लगाएको सम्झना मानसपटलमा प्रस्ट सजिएको छ। अहिले लक्का जवान भइसकेको म हरेकपल्ट जब ऐना हेर्दै दारी काट्छु, अनायास मेरो हात आफ्नै दारी सुम्सुमाउन पुग्छ, अनि उर्लिएर आउँछन् बुबासँग जोडिएको अतीत। तर, ऐनाकै अगाडि बसेर जति जोड गरे पनि, जति रोइकराई गरे पनि काउकुति लगाउने बुबाको आकृति कहिल्यै आएन। 
 भर्खर स्कुलको दैलो ढक्ढकाउन थालेको मलाई बुबा हमेसा भन्नुहुन्थो, ‘कुत्ता, राम्रोसँग पढिनस् भने लाउलास् मैले किनिदिने जुत्ता।’ मैले राम्रोसँग त पढेँ, तर मेरो भाग्य ठानौं वा नियति, बुबाले किनिदिएको जुत्ता मैले कहिल्यै लाउन पाइनँ। बुबासँग बिताएका अरू कुनै पनि पल मेरो सम्झनामा अट्न सकेन
 प्रधानमन्त्रीज्यू। केही वर्षअघि घरमा बुबाको फोटो आमाले फ्रेममा हालेर राख्नुभएको रहेछ। एकदिन मन दरो बनाएर आमालाई सोधेँ, ‘आमा, हाम्रो बुबाले कोट–पाइन्ट लगाउनु हुन्थ्यो हो?’ आमाले एकछिन मतिर हेर्नुभयो। उहाँका आँखा रसाउन थाले। मुखले केही भन्नुभएन। 
पछि दिदीले भन्नुभयो, ‘बुबाको त नागरिकताको फोटो मात्रै थियो हामीसँग। अनुहार पनि प्रस्ट नदेखिने त्यही फोटोलाई मिलाएर फ्रेममा राखी ठूलो बनाएका हौं।’ मैले दिदीसँग थप प्रश्न गर्न सकिनँ। 
 प्रधानमन्त्रीज्यू, 
बुबालाई स्मृतिका पानामा सजाउनसम्म नपाएका हामीले तपाईंलाई कयौंचोटि शंकाको सुविधा दिइरहेका छौं। बुबाको अभावमा प्रधानमन्त्रीज्यू, घरमा पार्टीका मान्छेको आवातजावत बाक्लिएपछि र गाउँका सुराकीले आर्मीलाई अनर्गल कुरा लगाएपछि बुबा आफूलाई असुरक्षित महसुस गर्न थाल्नुभएको थियो। 
मामाघरका सदस्यले उहाँलाई सहर जान वा सुरक्षित ठाउँ खोज्न अनुरोध गरेका थिए। तैपनि बुबा देशका खातिर तपाईंले देख्नुभएको सपना पूरा गर्न लागिरहनुभयो। बुबालाई आफ्नो ज्यानको टुंगो नभएरै होला, लेनदेनका कुरा आमालाई बताइरहनु हुन्थ्यो । उहाँलाई बेपत्ता बनाएपछि हामीले दिनुपर्ने सबैलाई दियौं, तर लिनुपर्ने ठाउमा जाँदा कतिले लिएकै छैन भने, कतिले आधा मात्रै दिए। 
एक जनाले त यतिसम्म भने, ‘पैसा लिन मन भए जसले दिएको हो, उही आउनुपर्छ।’ आमा केही बोल्नुभएन। मात्र गहभरि आँसु पार्नुभयो। म केही भन्नसक्ने नै भइनँ। आमालाई सम्झाएर घर लिएर आएँ। 
 आखिर ओरालो लागेको मृगलाई बाच्छोले पनि खेद्दो रहेछ! हाम्रो त्यो निम्न परिवारमा मियो हराएपछि हामी बेसहारा भयौं।
 एक–दुई दिन त आफन्तले माया गरेका थिए, तर कालान्तरमा उनीहरूकै लागि हामी आँखाका कंसिगर भयौं। हामी एक छाक मात्र खाएर कति रात भोकै सुत्यौं।
 बुबा आउनुहुन्छ कि भनेर हामी त्यो भरेको पखाईमा कति रात बाहिरै सुत्यौं। दिन बित्दै गए। स्कुल पढ्ने उमेरमा घरायसी बाध्यताले दिदी र दाइ पढाइ छाड्न विवश भए। 
 आमाको दैनिकी नै अर्काको घरमा मजदुरी बन्न पुग्यो। राति घर आउँदा सधैं चिउरा लिएर आउनुहुन्थ्यो। गाउँमा मजुदरी गर्नेहरूलाई खाजामा चिउरा दिने चलन छ। आमा त्यही चिउरा आफूले नखाई हाम्रा लागि ल्याइदिनु हुन्थ्यो। पछि त दाइ–दिदी पनि घरको कामभन्दा बाहिरको काममा जान झगडा गर्न थाले। किनकि, घरमा काम गरेको न पैसा पाइन्थ्यो न त खाजा। 
 घरको एक मात्र भरोसा रहनुभएका बुबालाई बेपत्ता बनाएपछि हाम्रा लागि मीठो खाने दिन कहिल्यै आएन। एकदिन छिमेकीको घरमा खसी काटेका रहेछन्। दाइ पनि मासु लिन भनेर जानुभएछ। तर, पैसा तिर्न सक्दैनौं भनेर खाली हात पठाइदिएछन्। 
हामीले केही गर्न र केही भन्न सक्ने अवस्थै थिएन। हामी त बेसहारा थियौं। गरिब थियौं। हाम्रो पक्षमा बोलिदिने कोही थिएन। त्यसैले त हो, दिदीले केही गल्ती नगर्दा पनि स्कुलमा सरले सबैका सामुन्ने पिटेर झुट बोल्न बाध्य पारे। त्यसैले त हो, हाम्रो कमजोरीको फाइदा उठाउँदै सबैले दाइलाई चोर र फटाहाजस्ता शब्दले पुकार्न थाले।

 त्यसैले त हो, अर्काको घरमा गएर बस्दा पनि ‘सावित्रीले चप्पल चोरी’ जस्ता निकृष्ट शब्दले आमालाई हेपिरहे। धेरैपछि एकदिन जिल्ला प्रशासन कार्यलय गोरखाले भन्यो, ‘हंसपुर–४, गोरखा निवासी माधव अधिकारी दोहोरो मुठभेडमा मारिए।’ 
 सरकारको यस्तो रवैया देखेर हामी झन् मर्माहत भयौं। दिनदहाडै अस्पतालबाट अमानवीय ढंगमा आर्मी ब्यारेक लगिनुभएका हाम्रा बुबा कसरी दोहोरो भिडन्तमा मारिनुभयो? हामी सधैं एउटै प्रश्न गरिरह्यौं, कि हामीलाई बुबाको सास चाहियो कि लास? तर, कसैले हाम्रो प्रश्नको जवाफ दिन सम्म आवश्यक ठानेनन्। 
 झन् तत्कालीन नेकपा माओवादीले बिनाप्रमाण मेरो बुबाले ‘सहादत प्राप्त गर्नुभएको’ सूचना दियो। र, भन्यो, ‘उहाँले देख्नुभएका सपना हामी पूरा गर्नेछौं।’ मूलपार्टीबाट छुट्टिएको अर्को एक समूहले सहिद सप्ताहका अवसरमा दिएको सम्मानपत्र पढेर त म चकितै परेँ। त्यसमा लेखिएको थियो, ‘हंसपुर–४ निवासी क. माधव अधिकारीले २०५८/२/५ मा सहादत प्राप्त गर्नुभयो।’
 जबकि, त्यो मितिमा मेरो बुबालाई आर्मीले गिरफ्तार नै गरेको थिएन। यसरी एउटै व्यक्तिलाई कहीँ बेपत्ता त कहीँ सहिद भनेर जिम्मेवार पक्षले पीडितलाई न्याय दिनु त कहाँ हो कहाँ, उल्टै गलत सूचना दिएर पीडामाथि पीडा थपिरह्यो। 
 अन्ततः आइसिआरसीका प्रतिनिधि बुबालाई बेपत्ता सूचीमा राख्न सहमत भए। प्रधानमन्त्रीज्यू, तपाईं आजभोलि ‘जनयुद्ध’ ले देखेको सपना लगभग पूरा भएको र अब त्यसको रक्षा गर्दै शान्ति प्रकियाको बाँकी कार्यभार पूरा गर्नुपर्नेमा जोड दिनुहुन्छ। 
 हजारौं पीडितको प्रतिनिधि आवाज बनेर म तपाईंलाई प्रश्न गर्न चाहन्छुः के दसवर्षे ‘जनयुद्ध’ कुनै अमुक व्यक्तिलाई सत्तामा पुर्याउन मात्र थियो? हैन भने, कहाँ पूरा भएका छन्, किताब बोक्दै स्कुल गइरहेका कलिला हातहरूमा बन्दुक थमाउँदै गर्दा देखाइएका सपना? कहाँ पूरा भएका छन्, बच्चालाई दूध चुसाउँदै गरेकी आमालाई युद्धमैदानमा होमिन प्रेरित गरिरहँदा देखाइएका रंगीन भविष्यका सपना? 
 आफ्नो जिन्दगीको ऊर्जाशील समयमा घर, परिवार, समाज, पैसा, सुखसयल सबै छाडेर युद्धमा होमिएका मान्छे जीविकोपार्जनका लागि अरबी मरुभूमिमा उँट चराउन विवश छन् भने कहाँ पूरा भए उनीहरुलाई बलिको बोको बनाउँदै गर्दा खाएका कसम? 

 मेरो नियति 
 प्रधानमन्त्रीज्यू, बुबालाई बेपत्ता बनाएपछि सानै उमेरको मलाई काठमाडौं लगेर अनाथालयमा पढाउने कुरा चल्यो। पाँच वर्षको उमेरमा मात्र बोली फुटेको र सानैमा रोगले सताएर धन्न बाँचेको भनिएको म धेरै कुराको भेउ पाउन सक्ने अवस्थामा थिइन। 
 अन्ततः म ठूलोबुबाको सहयोगमा १० घन्टा लगातार हिँडेर गोरखा सदरमुकाम आइपुगेँ। त्यहाँबाट अंकलको सहयोगमा काठमाडौं आएर मित्रता नेपाल फाउन्डेसनमा बस्न थालेँ। विस्तारै यहीँको वातावरणमा अभ्यस्त हुँदै गएँ। 
आजकाल म जबजब गाउँघर जान्छु, साना केटाकेटी देख्नेबित्तिकै अनायासै सोध्न पुग्छु, ‘तिमी कति वर्षको भयौं?’ 
 आमाको काखमा खेलिरहेका तिनीहरूमध्ये कतिले भन्छन्, ‘९ वर्ष।’
 जवाफ सुनेर मेरा आँखा त्यसै रसाउँछन्। सोच्छु, म आमाको काख छाडेर बिरानो ठाउँमा गएको यही उमेरमा त हो। 
 गाउँमा छ कक्षा पढ्दै गरेको म काठमाडौंको मनास्लु स्कुलमा पाँच कक्षाको प्रवेश परीक्षामा फेल भएकाले चारमा भर्ना पाएँ। त्यसयता भने मैले पढाइमा फेल भएको अनुभव गर्नुपरेको छैन। त्यही स्कुलबाट मैले ९० प्रतिशत ल्याएर एसएलसी पास गरेँ, अनि भक्तपुरस्थित एसओएस कलेजले दिएको छात्रवृत्तिमा ‘प्लस–टु’ पढेँ। प्लस–टु मा पनि ७९ प्रतिशत ल्याएँ। 
 म एमबिबिएस पढ्न चाहन्थेँ। नेपाल सरकारले एमबिबिएसमा सहिद परिवारका लागि भनेर कोटा छुट्टयाएको रहेछ। म सबै सिफारिस लिएर आवेदन भर्न गएँ। तर, ममाथि ठूलो बज्रपात त्यतिबेला भयो, जब उनीहरूले मैले निजी स्कुलबाट एसएलसी दिएको कारण देखाउँदै कोटामा नपर्ने जानकारी गराए।
 मैले आफ्नो अतीत सबै सुनाएँ, निजी स्कुलमा पढेको छात्रवृत्तिमा हो भनेर बताएँ पनि, तर उनीहरू मानेनन्। हामी जस्ताका लागि बोलिदिने कोही भएन। पहुँचवालाहरूले जाली प्रमाण बनाएर छात्रवृत्ति पाएको सधैं सुन्नमा आइरह्यो। आठ–नौ कक्षासम्म सुविधासम्पन्न निजी स्कुलमा पढेर छात्रवृत्तिकै लोभमा सरकारी स्कुलबाट एसएलसी दिएको नाटक गर्ने प्रवृत्ति पनि फस्टाइरह्यो। 
जबकि, मजस्तो छात्रवृत्तिको हकदार व्यक्ति यो सुविधाबाट विमुख भएँ। मैले उनीहरूलाई सम्झाएर सम्झाउनै सकिनँ। गाउँमा खान नपाएर, किताब–कापीबाट वञ्चित भएर स्कुल जानसम्म नपाउने बच्चालाई माया गरेर कसैले निजीमा पढाइदियो भने यसमा मेरो के दोष? के यो मलाई आफ्नै गाउँमा पढाउन नसक्ने मेरी आमाको दोष हो? कि, मलाई निजीमा पढाउने अनाथालयको गल्ती हो? कि, गरिब र उत्पीडितलाई सधैं हेपिरहने ‘उच्च’ भनाउँदाहरूको दोषी चस्माको गल्ती हो? कारण जे भए पनि, मैले ‘निजी’ स्कुलमा पढेकै कारण राम्रो अंक ल्याएर पनि सरकारी कोटामा छात्रृवत्ति पाइनँ। 
 तर, प्रधानमन्त्रीज्यू, मैले हरेस खाइनँ। मलाई स्कुलदेखि कलेजसम्म पढाउने अनाथालयले नै आखिरमा एमबिबिएस पनि पढाउने भयो। त्यो अनाथालयमा केही विदेशीको सहयोग थियो। 
उनीहरूले मेरो गरिबी, अतीत र मलाई जेहेन्दार विद्यार्थी ठानेर पढाइमा सहयोग जारी राख्ने निर्णय गरे। एमबिबिएसका लागि लाग्ने खर्चको केही हिस्सा भने मेरो परिवारले पनि बेहोर्नुपर्ने उनीहरूको सर्त थियो। सुरुमा आधी–आधी खर्च बेहोर्ने कुरा भयो। मैले सिधै ‘आधी त सक्दिनँ’ भनेँ। उनीहरूले भने, ‘आफ्नो उच्चशिक्षाको खर्च अलिकति भए पनि तिमीले बेहोर्नुपर्छ।’ 
 पाँच वर्ष एमबिबिएस पढ्न कुल ४५ लाख (होस्टल र खाना खर्चबाहेक) बुझाउनुपर्ने रहेछ। यसमा तीन किस्ता गरी १५–१५ लाख बुझाउनुपर्ने थियो। अनाथालयले मलाई पहिलो र दोस्रो किस्तामा १२/१२ लाख र तेस्रोमा १० लाख दिन सहमति जनायो। यसअनुसार मैले पहिलो र दोस्रो किस्तामा ३/३ लाख जुटाउनुपर्ने भयो भने अन्तिम किस्तामा ५ लाख खोज्नुपर्ने भयो। यसबाहेक होस्टल र खाना खर्चबापत महिनाको करिब १० हजार चाहिन्थ्यो। म दुबिधामा परेँ। दाइ वैदेशिक रोजगारमा खाडीदेश जानुभएकाले हाम्रो परिवारको आर्थिक अवस्था पहिलेभन्दा राम्रो नै थियो, तर उल्लेख्य प्रगति केही भएको थिएन। 
मैले दाइ र आमासँग कुरा गरेँ। परिवारले जसरी भए पनि खर्च जुटाएर मलाई एमबिबिएस पढाउने निर्णय गर्यो। अहिले म भरतपुरस्थित चितवन मेडिकल कलेजमा पढ्दैछु। पहिलो किस्ता तिर्दा सरकारले ‘सहिद परिवार’ लाई दिएको पैसा र अलिकति ऋण खोजेर आफ्नो हिस्साको ३ लाख बुझाएँ। दोस्रो किस्तामा ३ लाख खोज्न अलि गाह्रो पर्यो। तै जेनतेन टर्यो। 
सबभन्दा समस्या यसपालि परेको छ। यसपालि मैले तेस्रो किस्ताबापत् ५ लाख रुपैयाँ बुझाउनुपर्नेछ, जुन जति प्रयास गर्दा पनि जुटाउन सकेको छैन। प्रधानमन्त्रीज्यू, बल्लबल्ल पीडाबाट उठ्न खोजेको हाम्रो परिवारलाई वैशाख १२ गते हाम्रो गाउँबाट १३ किलोमिटर टाढा बारपाक केन्द्रविन्दु बनाएर आएको महाविनाशकारी भुइँचालोले झनै पीडा थपिदियो। 
भुइँचालोमा परेर हाम्रो घर सखाप भयो। प्रकृतिले दिएको यो पीडापछि परिवारलाई मेरो पढाइ खर्च जोहो गर्न धौधौ पर्यो। मैले कलेजले केही छुट दिन्छ कि भनेर प्रयास गरेँ। सरकारले ‘सहिद परिवार’ भनी प्रमाणित गरेको, भुइँचालोले ‘पूर्ण क्षति’ भनी सरकारले दिएको रातो कार्ड अनि अनाथालयको सिफारिस सबै बुझाएँ। तैपनि कलेजले मलाई एक पैसा छुट दिएन।
यही मेडिकल कलेजमा अलिकति पहुँच हुनेहरू ३०–३५ लाखमै पढिरहेको प्रमाण मैसँग छ। थोरै शुल्कमा पढिरहेका ती साथीहरू कोही ‘नेताको सोर्स लगाएर आएको’ भन्छन् त कोही आफ्नो बुबा ‘उपल्लो दर्जाका कर्मचारी छन्’ भन्ने जवाफ दिन्छन्। 
 मैले आफ्नो दुखेसो लिएर माओवादी नेताहरूलाई नभेटेको पनि होइन। मुखले ठिक्क पारे पनि मेरो समस्याको सुनुवाइ कसैबाट भएन। पछिल्लो एक वर्षमा मैले तत्कालीन गृहमन्त्री शक्ति बस्नेत, शिक्षामन्त्री गिरिराजमणि पोखरेल, माओवादी उपाध्यक्ष नारायणकाजी श्रेष्ठ, विद्यार्थी नेता रमेश मल्ल र जागृत रायमाझीलाई आफ्नो समस्या बुझाउने कोसिस गरेँ। 
तर अहँ, मैले ६ वर्षको उमेरदेखि बुबा नहुँदाको पीडा, ९ वर्षको उमेरमा बुबाको अभावमा छटपटाइरहेकी मेरी आमालाई छाडेर अनाथालयमा बस्नुपर्दाको भोगाइ अनि भुइँचालोपछि चिसो पालमुनि रात बिताउँदाको पीडा मेरो बुबाले नेता मानेका यी कसैलाई बुझाउन सकिनँ। आजित भएपछि मैले सोझै तपाईं ‘जनयुद्ध’ का नायकलाई नै भेटेर आफ्नो कुरा सुनाउने निधो गरेँ। 
 २०७२ मंसिर १८ गते माओवादी केन्द्रीय समितिको बैठक सकेर तपाईं बैठककक्षबाट बाहिर निस्कनुभएको थियो। म सुरक्षाघेरा तोडेर तपाईंको नजिक गएँ। र, भनेँ, ‘म जनयुद्धको सहिद हंसपुर–४, काफलडाँडा निवासी माधव अधिकारीको छोरा हुँ। तपाईंले अहिलेसम्म धेरैलाई जायज–नाजायज कामका लागि समय दिनुभएको छ। मलाई पाँच मिनेटको समय दिनोस् न।’ एकै सासमा मैले भनेको थिएँ। 
 त्यतिबेलासम्म तपाईं आफ्नो गाडीभित्र छिरिसक्नुभएको थियो। मलाई पनि आफूसँगै गाडीभित्रै डाक्नुभयो। त्यसपछि मैले आफ्नो पृष्ठभूमि बताउन मात्र के सुरु गरेको थिएँ, अघिल्लो सिटमा रहेका तपाईंका तत्कालीन स्वकीय सचिव चुडामणि खड्का बीचमै बोलिहाले, ‘ए, गोरखाकै बाबु रहेछ। मलाई पछि फोन गर्नू, म सबै कुराको व्यवस्था गरौंला। अहिले जाऊ।’ उनको कुरा सुनेपछि फेरि मैले तपाईंतिर हेरेँ। तपाईं केही बोल्नुभएन। म केही हुन्छ कि भन्ने आश बोकेर गाडीबाट ओर्लिएँ।
 त्यस दिनयता मैले चुडामणि खड्कालाई करिब सयचोटि फोन गरेँ, २३ वटा सन्देश पठाएँ। उनी फोन त धेरैजसो उठाउँथे, तर मैले आफ्नो परिचय दिनेबित्तिकै कहिले फोन काटिदिन्थे त कहिले ‘पछि गर्नू’ भन्थे। यो प्रक्रिया नियमित चलिरह्यो। 
 म आफूलाई भाग्यमानी सम्झन्छु, किनकि म विभिन्न अवसर पाएर यहाँसम्म आइपुगेँ। र, मेरो हैसियत धेरै सहिद परिवारको भन्दा माथि छ। ‘जनयुद्ध’ ले हाम्रो परिवारमा आमा र मेरो पुस्तालाई पीडा दियो। हाम्रो जिन्दगीमा कालो बादल ल्याइदियो।
 अहिले बल्लबल्ल धेरै कष्टपछि हामीले गन्तव्य पहिल्याउन थालेका छौं। मैले प्रण गरेको छु, अब म आफू मिहिनेत गरेर आउने पुस्तालाई खुसी दिन चाहन्छु। मलाई थाहा छ, म सप्रेँ भने मेरो आउने पुस्ता सप्रनेछ, म बिग्रेँ भने मेरो सिंगो पुस्ता नै बिग्रनेछ। 
मेरो परिवारको एक मात्र आशाको ज्योति म नै हुँ। मैले तमाम दुःख र गरिबीका बाबजुद आजसम्म यो ज्योति धिपधिपे जोगाएर राखेको छु। तर, यो धिपधिपे ज्योति अहिले निभ्ननिभ्न खोजेको छ। मैले तुरुन्तै ५ लाख जोगाड गरेर कलेजलाई बुझाउन सकिनँ भने मेरो एमबिबिएस पढाइ बीचैमा अवरुद्ध हुन्छ। पढाइ पूरा नगरे मेरो भविष्य बन्दैन। 
म पनि अरू थुप्रै सहिद परिवारजस्तै अरबको मरुभूमिमा पसिना बगाउन बाध्य हुनेछ। मलाई थाहा छ, त्यो मिहिनेतले तत्कालको गुजारा चले पनि न मेरो भविष्य बन्नेछ न त मेरो देशको। डाक्टर हुन सकेँ भने निश्चित रूपमा म देशको सेवा गर्न सक्षम हुनेछ। र, गर्छु पनि। म डाक्टर हुनु र नहुनुमा अब मात्र ५ लाख रुपैयाँको दुरी छ। मैले तपाईंलाई यति लामो खुलापत्र लेख्नुको कारण यही हो। 
म त्यस दिन तपाईंलाई भेट्न आउनु र हतारहतार आफ्नो सबै कुरा बेलिविस्तार लगाउनुको उद्देश्य पनि यही थियो। त्यतिबेला सुनुवाइ नभएकाले आज सार्वजनिक रूपमा यो अपिल गर्दैछु। 
 मेरो बुबालाई ‘सहिद’ भन्न मेरो मनले मान्दैन। उहाँलाई ‘सहिद’ को मान दिएको तपाईंहरूले नै हो। मान दिएपछि त्यसको आन राख्न पनि जान्नुपर्छ। मैले जिन्दगीको हरेक पाइलामा मिहिनेत गरेर यहाँसम्मको मुकाम आफैं तय गरेको छु। ‘सहिद’ कोटामा छात्रवृत्ति पढ्न पाउनु मेरो अधिकार थियो, जुन मैले पाइनँ। 
अब फेरि त्यसमा गुनासो गर्न चाहन्न। आग्रह यत्ति छ, मेरो एमबिबिएस पढाइको यो अन्तिम खड्गो पार लगाइदिनुस्। मेरो धिपधिपे ज्योति निभ्न नदिनोस्। म अहिले एमबिबिएस दोस्रो वर्षमा छु। मेरो प्रत्येक सेमेस्टरको नतिजा राम्रो छ। यसअघि एसएलसी र प्लस–टु मा पनि राम्रै अंक ल्याएको हुँ। 
यस आधारमा डाक्टर बन्ने मेरो ल्याकत देख्नुहुन्छ भने मलाई आर्थिक सहायता गर्नुस्। यसका लागि मलाई पैसा दिनुपर्दैन। कलेजबाट आर्थिक सहुलियतको प्रबन्ध मिलाइदिए पनि पुग्छ। माथि भनिसकेँ, मेरो कलेजमा ३०–३५ लाखमै एमबिबिएस पढिरहेका विद्यार्थी थुप्रै छन्। 
मलाई यसपालि ५ लाख छुट दिए पनि मेरो कुल पढाइ खर्च उनीहरूको भन्दा बढी ४० लाख हुन्छ। यो सरकारले हालै तोकेको अधिकतम शुल्कभन्दा बढी नै हो। त्यस अर्थमा तपाईंसँग त्यति ठूलो कुरा मागिरहेको छु भन्ने मलाई लाग्दैन। 
र, तपाईंले चाहनुभयो भने यो पूरा गर्न त्यति अप्ठ्यारो वा नाजायज हो भन्ने पनि मलाई लाग्दैन। नाजायज हो वा यो माग कुनै हालतमा पूरा गर्न सकिन्न भने खुलस्त भनिदिए हुन्छ। 
 मैले एकचोटि तपाईंलाई व्यक्तिगत रूपमा भेटेर आफ्नो कुरा राखेँ। आज सार्वजनिक रूपमा राख्दैछु। र, यो अन्तिम हो। तपाईंले यसपालि पनि सहयोग गर्नुभएन भने म अब तेस्रोचोटि सहयोगको याचना गर्न आउने छैन। तेस्रोचोटि तपाईंसामु हात पसार्ने छैन। 

 यो खुलापत्रको आसय अरू कसैबाट सहयोगको अपेक्षा होइन। कोही शुभेच्छुकले मेरो खुलापत्र पढेर सहयोग गर्न चाहनुभयो भने म उहाँहरूलाई धन्यवाद भन्न चाहन्छु, तर माफी चाहन्छु म तपाईंको सहयोग स्वीकार गर्न सक्दिनँ। 
 म त्यो व्यक्ति वा संस्थाको मात्र सहयोग स्वीकार गर्छु, जो मेरो हालतमा जिम्मेवार छन्।
 यसमा सबभन्दा पहिला आउँछन्, माओवादी अध्यक्ष पुष्पकमल दाहाल, जसलाई पछ्याउँदा–पछ्याउँदै मेरो बुबा बेपत्ता हुनुभयो।
 दोस्रो, सरकार, जसले मेरो बुबालाई बेपत्ता पार्यो।
 सरकारले मेरो पढाइ, मैले अहिलेसम्म पाएको नम्बर, मेरो अतीत र मेरो भविष्य हेरेर सहयोग गर्न योग्य ठान्यो भने गरे हुन्छ, नभए पर्दैन। संयोगले आज माओवादी अध्यक्ष र सरकारप्रमुख दुवै तपाईं नै हुनुहुन्छ।
 र, तेस्रो चितवन मेडिकल कलेज जसले ५ लाख रुपैयाँ मात्र छुट दिँदा पनि मेरो भविष्य बन्छ। 
यसले उनीहरूलाई नोक्सान केही हुने होइन, म ४० लाख त कलेजलाई तिरिनै हाल्छु। कसैबाट सहयोग पाइनँ भने पनि गुनासो केही छैन। 
त्यो अवस्थामा मेरो पढाइ कसरी पूरा होला, अहिले म भन्न सक्दिनँ। 
केही त होला! केही त गरिएला! 
 यति भन्दै तपाईंको दोस्रो कार्यकाल शुभ रहोस् भन्ने कामना गर्छु। 
 धेरै धेरै शुभकामना...

(सुदन अधिकारी ,हंसपुर–४, कापलडाँडा, गोरखा, नेपाल) (सेतोपाटीबाट साभार )
Last edited: 23-Aug-16 03:47 AM

 


Please Log in! to be able to reply! If you don't have a login, please register here.

YOU CAN ALSO



IN ORDER TO POST!




Within last 90 days
Recommended Popular Threads Controvertial Threads
डीभी परेन भने खुसि हुनु होस् ! अमेरिकामाधेरै का श्रीमती अर्कैसँग पोइला गएका छन् !
शीर्षक जे पनि हुन सक्छ।
What are your first memories of when Nepal Television Began?
Sajha Poll: नेपालका सबैभन्दा आकर्षक महिला को हुन्?
NRN card pros and cons?
Basnet or Basnyat ??
निगुरो थाहा छ ??
Nas and The Bokas: Coming to a Night Club near you
TPS Re-registration
अमेरिकामा छोरा हराएको सूचना
Breathe in. Breathe out.
Drawback for applying NRN card
nrn citizenship
Democrats are so sure Trump will win
My facebook archive (for sale)
Top 10 Anti-vaxxers Who Got Owned by COVID
Doctors dying suddenly or unexpectedly since the rollout of COVID-19 vaccines
ढ्याउ गर्दा दसैँको खसी गनाउच
Sajha has turned into MAGATs nest
Send Parcels from USA to Nepal & Worldwide.
Nas and The Bokas: Coming to a Night Club near you
NOTE: The opinions here represent the opinions of the individual posters, and not of Sajha.com. It is not possible for sajha.com to monitor all the postings, since sajha.com merely seeks to provide a cyber location for discussing ideas and concerns related to Nepal and the Nepalis. Please send an email to admin@sajha.com using a valid email address if you want any posting to be considered for deletion. Your request will be handled on a one to one basis. Sajha.com is a service please don't abuse it. - Thanks.

Sajha.com Privacy Policy

Like us in Facebook!

↑ Back to Top
free counters